Kuyaw na kaayo

Dili na gyud angay’ng mokumpiyansa karong panahona, ilabi na kadtong mga tawo nga nalambigit sa drugas, ug bisan kadtong mga gidungog lang nga naapil niining maong bisyu.

Nakabantay man gud ko nga ang mga tawo nga gipatay, ug kadtong mga gisuwayan pagpatay, mga gidudahan gyud nga sila nalambigit sa drugas. Apan bisan og wala kita malambigit sa drugas, dili gyud angay’ng mokumpiyansa.

Tan-awa ang nahitabo ni magpapatigayon Wellington Lim kagahapon sa kaadlawon, gitinguha unta siya nga patyon. Swerte lang nga nakasulod na si Lim sa iyang bullet proof nga sakyanan mao nga wala mapatay.

Ang security guard sa iyang gipanag-iyang imnanan diha sa Archbishop Reyes Avenue, diin didto gikan si Lim ug mihatud ra unta sa iyang agawon paingon sa giparkingan sa iyang sakyanan, maoy napatay. 

Wala malilong kanato nga si Wellington ug ang maguwang niini nga si Peter Lim, giimbestigar kaniadto sa pasangil nga nagpayuhot sila og shabu. Duha sa ilang mga kanhi kawani ang mihimo sa pasangil.

Ang duha nila ka kawani nag-ulhos-ulhos lang pagkamatay. Ang usa gipusil didto sa eskina Katipunan ug Salvador Street, Labangon, samtang ang usa gipatay usab ug mora’g gidauban pa didto sa Talisay.

Samtang wala’y ebidensya, pero dunay mga pagduda nga nalambigit niini ang magsuong Lim. Niining pagtinguha pagpatay ni Wellington kagahapon sa kaadlawon, dili imposible nga nalambigit ang mga suod sa kanhi nila kawani nga gipatay.

Posible man gud nga naghuwat ra sila og tukma nga higayon aron makabawos. Mora’g mikumpiyansa ang mga guwardiya ni Lim. Ambot og daghan ba sab siya og guwardiya pareho sa iyang maguwang nga si Peter.

Tambag nako sa magsuon nga Lim, dugangi pa ang inyong pagmatngon kay dili imposible nga duna gyu’y mga tawo nga nagtinguha pagpatay kaninyo. Wala kita makaila kon kinsa sila.

Ang nindot lagi unta sa kapolisan mao ang pagpahugot g’yud sa seguridad pinaagi sa pagpahigayon og subsob nga checkpoint. Sagad sa mga tawo nga mamusil magsakay ra gyud og motorsiklo sa ilang paghimo sa krimen.

Apan kadto hinoon nga mipusil ni Lim, nagsakay sila og four-wheel vehicle, ug armado sila og high-powered firearms. Sigurado man gyud nga kon nasugatan pa sila og mga polis, makigpinusilay sila.

Nakadungog ko nga ang pamilya ni Wellington Lim mora’g wala kaayo makigtambayayong sa kapolisan, hinungdan nga ang mga polis, naglisud sa paghimo og follow-up operations.

Mao sab kini ang nakadaot kay kon ilado gani nga mga tawo, ang kapolisan maikog moratsada aron imbestigahon ang nalambigit sa hitabo. Apan kon mga pobre gani, aw, sayun-sayonon lang.