Vigilantes?

Nireklamo ang kapolisan sa paghulagway sa media nga sunod-sunod ang pagpamatay dinhi sa Metro Cebu sa niaging mga buwan.

Matud sa kadagkoan sa Police Regional Office-7 nga dili mahulagway nga “series,” kun sagunson ang maong mga kaso tungod kay wala kuno’y ‘pattern’ nga gisubay.

Matud ni Chief Superintendent Robert Quenery nga maisip nga ‘isolated’ lang ang maong mga kaso ug dili konektado.

Sukad niadtong Pebrero 19 diin gibanhigan ug gipatay ang abogado nga bise mayor sa Ronda nga si Jonnah John Ungab, hangtud karon moabot na og mga kapin sa 50 ka kaso sa pagpamusil diin sagad sa mga biktima namatay gyud.

Kon imong tan-awon ang maong gidaghanon nagpasabot ni nga matag-adlaw duna’y gipusil.

Apan bisan niini, nagdumili gihapon ang kapolisan pag-angkon nga sagunson ang nahitabong patay.

Sa akong nasabtan, lahi ang pagsabot sa mga opisyal sa kapolisan sa pulong “series.”

Ang pagsabot ni Quenery mao nga kini nagkahulogan og kabit-kabit, kun konektado sama sa series lights.

Apan dili kini maoy importante kon konektado o dili ang maong mga kaso ang kamatuoran nagpabilin nga dunay mga kinabuhi nga nabugto.

Ilang tahas sa kapolisan ang pagsumpo sa maong mga kaso ug ang pagsiguro nga mataral sa hukmanan ang mga responsable.

Kon pattern man ang hisgotan, dunay usa ka butang nga common sa kasagaran sa mga kaso sa pusil dinhi sa Metro Cebu. Kini mao nga sagad sa mga biktima gidungog, o ba kaha duna gyu’y record sa kalambigitan sa negosyo sa drugas.

Tingali, 90 porsiyento sa mga biktima sa pusil may record sa kalambigitan sa drugas, ug sagad sa maong mga kaso wala sab masulbad sa kapolisan.

Kini maoy hinungdan nga mitumaw ang pagduda nga dunay vigilantes nga naglihok dinhi sa Sugbo paglutos sa mga nalambigit sa drugas.

Kon duna man, hinaot nga wa’y mga inosente nga mapagan!