EDITORYAL - Drug test permanentehon

Magsugod na pagdagsa ang mga pasahero diha sa Cebu South Bus Terminal sa Cebu City ug sa North Bus Terminal diha sa Mandaue City nunot sa nagsingabot nga bakasyon dungan niining pagtimaan sa Semana Santa. Sa CSBT adunay pito ka drayber ug konduktor nga giingong nagpositibo sa drugas sa gihimong drug test nga gipasiugdahan mismo sa mga bus operators.

Kining drug test sa mga drayber sa mga bus ug minibus nga inisyatiba sa mga operators, sagad lang mahitabo kon panahon sa tingbakasyon, sa Pasko, o sa tingtapos sa klase. Nagbunga kini og positibo nga resulta kay aduna man gyu’y nangasakpang mga drayber nga tiggamitan gihapon og ilegal nga drugas. Maayo kini kay makasiguro ang mga sumasakay nga dili sabog sa drugas ang drayber nga maghatud kanila sa ilang mga destinasyon.

Apan ang labing maayo nga bisan og dili panahon sa tingbakasyon himuon kining drug test sa mga drayber sa mga sakyanang pasaheroan?

Tinuod, adunay drug test sa mga drayber matag renew nila sa ilang lisensya, o mokuha og lisensya, apan kausa ra man. Sa ubang mga adlaw nga nagbiyahe kining mao nga mga drayber, masiguro ba nato nga wala kanila’y nigamit og drugas?

Kadtong magpositibo sa drug test, diha-diha nga isumbong sa kapolisan ug dili na tugotan nga makabalik sa pag-drive kon dili sila mapaubos sa rehabilitasyon. Ang mga bag-ong drayber pasidan-an niining maong palisiya aron dili sila mosulod sa bisyo kon gusto sila nga motrabaho. Sa pikas bahin, wala pa’y balita sa North Bus Terminal kon may susama ba nga drug test sa mga drayber nga ilang gihimo.

Mas maayo gyud nga ang drug test himuon kada buwan aron sa ingon makasiguro gyud ang mga pasahero nga dili drug addict ang drayber sa ilang gisakyan. Ang gasto nga gikinahanglan, mahimo man nga mangayo’g tabang ang mga operators sa mga ahensiya sa gobiyerno kay para man kini sa kaluwasan sa publiko.