Ang Lapu-Lapu City diay

Adunay usa ka sinuwat nga giulohan “Can anyone own the beach?”  Mapanag-iya ba ang baybayon? Dili ba ni public domain? Sa ato pa, iya sa katawhan.

Ang Boracay karon, adunay dakong kahigayonan nga matak-opan gikan sa unom ka bulan ngadto sa usa ka tuig, gumikan sa kahugaw ug sa mga obstruction ug ilegal nga mga construction.

Familiar kaayo ang maong mga kalapasan. Kini tungod kay ang maong talan-awon ug sitwasyon, maoy atong makita ug masinati sa Opon.

Hinumdoman nga ang pagguba sa mga ilegal construction sa kabaybayonan sa Opon, usa unta sa nag-unang buhaton ni kanhi gobernador Tingting de la Serna. Apan, wa siya’y nahimo kay matud pa, ang naghimo niining maong mga construction, maoy tag-iya sa baybayon nga ilang gikoral.

Meaning naghupot na sila’g titulo sa maong mga baybayon. So, ang pangutana “Can anyone own the beach?,” ang tubag, mahimo diay? Exclusive ba kini sa dakbayan sa Lapu-Lapu lang kay didto sa Boracay nagsugod na man sila’g pangguba sa mga infrastructure duol kaayo sa baybayon?

Kining maong talan-awon, dili sa Boracay ug sa Lapu-Lapu lang, kon dili, sa tibuok kapupod-an gayud, nga matud pa: “A lot of establishments and resort have the habit of fencing beyond the shores into the sea, and most are concreted walls. Aside from being an eyesore, aren’t those illegal? Can anyone own the beach?”

Sa iyang pakigpulong sa Tarlac City, gipahimangnoan ni Presidente Digong Duterte nga iyang dakpon ug i-charge og sedition ang mga opisyal sa Boracay ug mga negosyante nga dili mo-cooperate sa kampanya sa gobiyerno pagsulbad sa pollution sa Boracay. Kuyaw no?

* * *

Maora og nasudlan og politika ang atong Regional Development Council (RDC) dinhi. Kaanugon. Inay nga magpauswag ug magpalambo kini sa mga kaugmaran sa atong region, nahimo kining babag sa mga proyekto sa mga kaatbang sa politika.

Nakatan-aw man ko sa portion sa ilang deliberation, akong nakita nga dili kini mao ang RDC sa unang katuigan. In most instances ang mga representante sa private sector, magpakahilom lang, apan karon sila man ang hawod. Ngano man ni?

* * *

Unsa gud ni, hapit na man ma-kada adlaw ang pinatyanay sa atong dakbayan ug lalawigan. Unya, kasagaran niini wala’y kasulbaran. Ngano man ni?

Nituo ko nga kining “riding-in-tandem” nga magmaskara, usa sa  nakatampo paghitak sa kriminalidad, dili lang dinhi sa atong dapit, kon dili, sa mga dagkong dakbayan sa nasud. Unta nga makakita og kasulbaran niini ang atong kapolisan.