$10 milyones ni Marcos

Dili na sekreto ang kalambigitan ni kanhi presidente Ferdinand Marcos ngadto ni Paul Manafort, kanhi campaign manager ni US President Donald Trump nga gikiha na sa nagpadayong imbestigasyon sa posibleng kalambigitan sa Russia pagmaniobra sa niaging piniliay sa Estados Unidos nga nakapadaog ni Trump.

Apan nagpabilin ang karaang misteryo, nga nabanhaw, karon nga nadakpan si Manafort sa imbestigasyon sa kampanya ni Trump nga gipangulohan ni Special Counsel Robert Mueller, sa nawagtang nga $10 milyones nga giingong gitampo ni Marcos sa kampanya ni anhing Presidente Ronald Reagan niadtong 1984 pinaagi ni Manafort.

* * *

Ang nakapabuhi sa 34 ka tuig na nga misteryo mao ang duha ka sinaligan ni Reagan—sila si Ed Rollins, campaign manager ni Reagan niadtong 1984, ug kanhi Senador Paul Laxalt nga maoy gisugo ni Reagan sa pagkumbinser ni Marcos sa pagbiya sa Malakanyang atol sa People Power Revolution sa 1986.

Si Laxalt nitug-an ni Rollins nga nagsige og pamuyboy si Marcos niya nganong gipasagdan ni Reagan ang iyang pamunoan nga nakahatag man unta siya og $10 milyones sa iyang kampanya. Nahibaw-an ni Rollins ang posibleng katin-awan nganong wa madawat ni Reagan ang kuwarta.

* * *

Sa iyang librong “Bare Knuckles and Back Rooms, My Life in American Politics,” giila ni Rollins si Ronaldo Zamora nga maoy nitug-an sa ilang pagsawo og panihapon sa Manila human napalayas si Marcos, nga siya ang naghatag sa $10 milyones ngadto ni Manafort ug nitabang pa gani siya pagpayuhot sa kuwarta gawas sa Pilipinas.

Tungod sa libro ni Rollins, si Laxalt nangangkon nga nakasabot na siya nganong nagsige og panudya si Marcos dihang niduaw siya sa Malakanyang sa wa pa’y Edsa nga gibudhian siya ni Reagan.

* * *

Apan niinsister si Bay Buchanan, mamahandi sa kampanya ni Reagan sa 1984, nga wa sila makadawat sa kuwarta ni Marcos. Gawas pa, ilegal ang pagdawat og tampo sa kampanya gikan sa mga dili Amerikanhon. Nitataw sab si Buchanan nga wa sila maglisod sa kuwarta tungod sa popularidad ni Reagan.

Gipanghimakak nilang Zamora ug Manafort ang pangangkon ni Rollins. Pipila sa mga dokumento nga nasakmit sa Customs sa pag-abot ni Marcos sa Hawaii niadtong 1986 nag-detalye hinuon sa iyang mga tampo sa kampanya nilang Reagan ug ubang Amerikanhong mga politiko.

* * *

([email protected])