CIDG ra’y nagtikawtikaw

Haskang luoya man diay sa imbestigasyon sa mga polis sa pasangil nga nagkunsabo sa negosyo sa ilegal nga drugas sila si Peter Lim ug Kerwin Espinosa.

Kon tuohan ang pangangkon sa Criminal Investigation and Detection Group (CIDG), ang ila ra nga mga imbestigador ang nagtikawtikaw sa pagpanghipos og mga ebidensiya batok ni Lim, nga ginganlang drug lord ni Presidente Rodrigo Duterte, ug ni Espinosa, nga nikumpisal nga drug lord sa iyang pag-atubang sa mga senador.

Wa’y laing ahensiya sa gobiyerno nga nitabang nila. Gibasura pa gani sa Department of Justice ang kasong ilang gipasaka.

* * *

Nipadayag og kasubo si Director Roel Obusan, nasudnong hepe sa CIDG, nga bisan sa iyang pagkumpisal atubangan sa Senado nga nikita siya og P50 milyones matag tuig sa iyang negosyo sa ilegal nga drugas sa Sugbo ug Kabisay-an, wa motabang si Espinosa sa ilang imbestigasyon.

Gani, dihang gisukitsukit sa mga imbestigador sa CIDG mahitungod sa iyang mga tubag sa pangutana sa mga senador sa presensiya sa iyang abogado nga si anhing Ronda Vice Mayor Jonnah John Ungab, gihulagway ni Obusan si Espinosa nga nasuko nila ug nibakwi sa tanan niyang mga pangangkon.

* * *

Gibutyag sab ni Supt. Royina Garma, hepe sa CIDG sa Central Visayas, nga wa sila tabangi sa mga ahensiya sa gobyerno nga ilang gipangayoan og mga dokumento sa ilang pakisusi sa mga negosyo, katigayonan ug kalihokan sa posibleng kalambigitan ni Lim sa ilegal nga drugas dinhi sa Sugbo ug ubang bahin sa nasud.

Ginganlan ni Garma ang mosunod nga nangiyugpos nga mga ahensiya: Bureau of Internal Revenue (BIR), Bureau of Immigration (BI) ug Maritime Industry Authority (MARINA).

* * *

Ngano nga nagmingaw man ang CIDG sa kaso batok nila ni Lim ug Espinosa? Dili pa ba diay igo ang masuk-anon nga mga pasangil ni Presidente Duterte, apil na ang iyang hulga nga patyon si Lim, nga makapalihok sa tanang hingtungdan nga mga ahensiya sa gobiyerno?

Dili ba gisugo man sa presidente ang National Bureau of Investigation (NBI) pag-imbestigar ni Lim? Unsa may nahitabo sa pag-atubang ni Lim sa nasudnong buhatan sa NBI pila ka adlaw human sa ilang panagtagbo sa presidente sa Davao niadtong Hulyo 2016?

Nganong abunda man ang mga timaan nga dili seryuso ang imbestigasyon?

* * *

([email protected])