Nagkita na gyud sila

Natuman na gyud ang pangandoy ni kanhi mayor Mike Rama nga magkasultihanay sila si Presidente Duterte nga mipasangil kaniya nga drug protector. Kaniadtong Biyernes sa kadlawon sila nagkatagbo didto sa Davao.

Miadto si Rama sa Davao kay mitambong sa convention sa mga rotary club. Giswerte si Rama kay ang mga opisyal sa rotary club gihatagan man og higayon nga magkatagbo og si Duterte.

Wala kaayo idetalyi ni Rama unsay ilang gipanagsultihan ni Duterte. Dili gani siya makapaniguro nga wad-on na ni Duterte ang iyang ngalan sa listahan sa mga drug protectors.

Kinahanglang maninguha gyud si Rama nga malimpyohan ang iyang ngalan sa mga drug protector kay nagsingabot ra ba ang eleksiyon karong sunod tuig.

Kon magpabilin sa listahan ang iyang ngalan, sigurado nga gamiton kini sa iyang mga kaatbang, ilabi na si Mayor Tomas Osmeña, sa pagdaot kaniya aron dili siya botohan sa katawhan.

* * *

Nangundang kuno pag-operate og mga illegal gambling machines dinhi sa dakbayan sa Sugbo ang ubang operators kay mihulga ang Criminal Investigation and Detection Group (CIDG) nga tinud-on ang paghimo’g kampanya sa mga kapitan kon dili makapahunong.

Apan nganong may mipahibalo man nako nga daghan pa nga video karera ug moli-moli diha sa Lawis, Barangay Pasil ug sa tumoy nga bahin sa Pasil.

Anaa kini sa usa ka compound duol sa tulay nga nagdugtong sa Ermita. Duol kuno sa kapilya, ug ang maong mga karera ug moli-moli.

Awhagon nako ang CIDG ug ang mga sakop sa Sawang Calero Police Station nga sakmiton unta dayon ang maong mga gambling machines.

Apan ngano kaha nga wala man himoi sa CIDG og kampanya kining sindikato sa mga operators og swertres no? Mas maayo pa ang NBI kay gihimoan nila og operation ang illegal swertres diha sa dakbayan sa Lapu-Lapu. Apan dinhi sa dakbayan sa Sugbo, mikatap ang illegal swertres nga gipasagdan ra.

Sayonan ka nga ang mga illegal swertres operators nagbutang man gyud og mga gagmay’ng booth nga kon tan-awon nimo, magtuo ka gyud nga legal.

Kadtong gi-raid sa NBI didto sa Lapu-Lapu giingon nga mga outlets kadto sa GlobalTech Corp. ug Galaxy Gaming nga matud pa mga ilegal. Base sa report, gikutlo si Federico Damole, ang department manager sa Visayas sa Philippine Charity Sweepstakes Office nga mitug-an nga ilegal ang maong mga outlets sa GlobalTech.

Unya, nganong nangiyugpos ra man niini ang mga polis? Hisgotan pa nato ni sa sunod lindog.