Ang underpass project ni Rep. Del Mar

Nagkapuliki karon ang atong lokal nga mga opisyal ug mga ahensiya sa kagamhanan pagpangita og sulosyon sa nagkagrabe nga problema sa trapiko dinhi sa Metro Cebu. Adunay mga proyekto nga gihan-ay apan wala pa’y klaro ang implementasyon tungod lagi kay dili magkasinabot kadto nga mga anaa sa puwesto.

Usa sa mga naapektohan niini mao ang proyekto ni Cebu City North District Representative Raul del Mar nga mga underpass o tunnel nga iya nga gipaninguha nga matukod sa dakbayan. Kini gawas pa sa mga skyway nga iya nga gipaningkamotan nga mahimo usab nga alternatiba.

Siguro angay nga lilion sa Department of Public Works and Highways ug sa Regional Development Council kining mao nga proposal ni Del Mar. Sa ako nga nakita, dako kini nga ikatabang pagsulbad sa problema sa trapiko dili lang sa dakbayan sa Sugbo, kon dili, lakip na sa silingan nga mga lugar.

Ilalum sa proposal ni Del Mar, adunay tulo ka underpass o tunnel ang iya nga giduso aron nga maimplementar. Una niini mao ang pagtukod og underpass gikan sa D. Jakosalem Street ngadto na sa Barangay Talamban. Siguro makaingon mo ngano nga puwerte kini ka taas nga proyekto.

Sa mao nga underpass, adunay mga exit point nga kagawsan kadtong mga motorista nga dili moderitso sa Talamban. Pananglitan kon moadto ka sa usa ka mall sa Cebu Business Park, adunay exit point diha sa Archbishop Reyes Avenue nga imo nga kagawsan. Gisugyot usab ni Del Mar nga magtukod og underpass o tunnel gikan sa Salinas Drive sa Barangay Lahug paingon sa Sergio Osmeña Jr. Boulevard sa may pier area. Niini nga underpass, adunay exit point sa Pope John Paul Avenue.

Ikatulo nga proyekto nga iya nga gi-proposed mao ang underpass gikan sa Cardinal Rosales Avenue lapos ngadto sa Hernan Cortes Street sa dakbayan sa Mandaue. Aduna kini exit point sa F. Cabahug Street sa mao nga dakbayan. Nindot kaayo kon matuman kini tungod kay una kini nga klase sa proyekto sa nasud.

Klaro nga kini nga mga underpass o tunnel dako kaayo og ikatabang pagsulbad sa problema sa trapiko sa mao nga mga lugar. Kini tungod lagi kay adunay laing kaagian sa ilalum ang mga motorista nga dili na sila makadugang sa kahuot sa dalan sa ibabaw.

Dako gayud ang magasto sa kagamhanan niini. Apan sige lang kay kon mahuman na kini dako usab unya ang kontribusyon niini sa kasulbaran sa problema nga ato nga gisagubang karon.

Usa pa, ang konstruksiyon sa mga underpass tua man sa ilalum ug dili gayud makabalda sa trapik sa kadalanan sa ibabaw.