Wa’y Cha-Cha karong tuiga
Sa labing unang higayon, giangkon ni House Speaker Pantaleon Alvarez nga mahimong maapiki ang ilang kalendaryo sa pag-usab sa 1987 Constitution. Sa iyang pakighinabi sa Arangkada sa DYAB Abante Pa, Bisaya! gahapon, gipahibawo ni Alvarez nga maglisod na sila sa pagpahigayon sa plebisito sa Cha-Cha karong tuiga.
Bisan sa hingpit nga mayoriya nga gipahimuslan sa mga alyado ni Presidente Rodrigo Duterte sa House of Representatives ug sa Senado, napakyas ang administrasyon sa pagduso sa ambisyuso kaayo nilang kalendaryo sa dinalian nga pag-usab sa sistema sa gobiyerno ngadto sa federal.
* * *
Ang orihinal unta nga kalendaryo nga gitakda nilang Alvarez ug ubang haligi sa House mao ang paghingpit sa kausaban sa Konstitusyon sayo karong tuiga aron nga madasonan dayon sa mga botante pinaagi sa plebisito nga idungan sa piniliay sa barangay ug Sangguniang Kabataan (SK) karong Mayo 14 ning tuiga.
Apan kay wa man mag-apura ang mga senador, labi na dihang niinsister silang Alvarez og joint voting sa constituent assembly sa House ug Senado, napugos ang mga kongresista sa pagpauswag sa piniliay aron nga madungan gihapon sa plebisito sa Cha-Cha unya sa Oktubre.
* * *
Kay wa may senador nga nagtagad pagpasaka og balaudnon sa pag-uswag sa piniliay sa barangay ug SK, ug kay wa may timaan nga si Presidente Duterte mo-certify nga urgent sa balaudnon, niangkon si Alvarez nga mahimong madayon ang piniliay nga wa’y plebisito karong Mayo.
Mao ni sukaranan sa kabalaka ni Alvarez nga dili kaugpo ang Cha-Cha karong tuiga ug unya na makabuylo liwas sa lokal ug nasudnong piniliay sa Mayo sunod tuig.
* * *
Matud ni Alvarez nga dili sila makatutok sa Cha-Cha human sa bakasyon sa Semana Santa kay magpaabot pa man unsa’y iduso nga kausaban sa Konstitusyon sa Consultative Committee (Con-Com) nga gipangulohan nila ni kanhi Chief Justice Reynato Puno ug kanhi Senate President Nene Pimentel.
Human sa State of the Nation Address (SONA) ni Presidente Duterte karong Hulyo, magsugod na sila pagtuki sa iduso sa Malakanyang nga nasudnong budget sa 2019.
Sa dili pa maaprobahan ang budget, mopasaka na ang mga senador ug mga kongresista sa ilang certificates of candidacy alang sa piniliay sa Mayo 2019. Tungod sa hilanat sa kampanya, lisud na nga matutokan ang Cha-Cha.
* * *
- Latest
