Bugalbugal ni Tomas

Nakapanghambog si Mayor Tomas Osmeña niadtong ika-81 nga Charter Day sa siyudad sa Sugbo nga nakakuha siya og P600 milyones nga pundo gikan sa administrasyon ni Duterte bisan og siya loyal sa Liberal Party.

Wala man gyuy daotan kon adunay maabot nga pundo gikan sa administrasyon. Apan dili kini angayang ikapanghambog kay alang man kini sa mga kabus nga lumolupyo sa siyudad nga gihatag ni Presidente Rodrigo Duterte pinaagi sa Department of Social Welfare and Development.

Ang nakalaksot pa gyud, kay sa speech ni Tomas atol sa Charter Day, iyang gibugalbugalan ang administrasyon nga Duterte kay matud niya nga bisan loyal siya sa Liberal Party nalutsan siya sa maong pundo nga gikan sa administrasyong Duterte.

Aduna kita’y higala sa Malacañang nga nagsulti kanato nga ang maong pundo gikan sa kagamhanang nasyonal ipanghatag sa mga barangay isip livelihood assistance pinaagi sa DSWD.

Sumala pa sa atong tinubdan nga adunay espesyal nga mando si DSWD regional director Ma. Evelyn Macapobre nga kinahanglang dili gamiton sa pamolitika ang maong pundo ug i-release kini nga patas ngadto sa tanang barangay.

Kon mao kini, angayang monitoron si Macapobre kon i-release na unya kining maong pundo, kay sa higayon nga mag-apil-apil siya sa politika ug makigkunsabo siya sa mga tawo diha sa City Hall aron paboran ang mga barangay nga relesan niini, Ombudsman ang iyang sangpotan.

Maayong timan-an sa DSWD nga kanang mga Barangay Mayor’s Office sa mga barangay wala kana sila’y mga “legal personality” subay sa gimbut-an sa balaod.

* * *

Adunay mga interesadong grupo nga nagsige og sulsol kang Davao City Mayor Sara Duterte. Kay hangtod karon, wala pa kita’y makitang hinungdan nga mag-away ang anak sa presidente ug si Speaker Bebot Alvarez.

Gawas sa kasuod sa presidente, si Alvarez nakamugna og “super majority” sa Ubos Balay Balaoranan, nga labing una sukad sa mga nangaging Kongreso.

Mitumaw ang mga estorya nga si Inday Sara naglaraw nga mag-Speaker human sa eleksiyon sa 2019. Layo pa kaayo kon makigsungag na ang anak sa presidente sa Speaker nga suod sa iyang amahan.

Hinuon, adunay mihunghong kanako nga si Sara ang gigamit sa iyang amahan aron labtikan si Bebot Alvarez nga usahay misubra na sa iyang mga panulti, sa iyang baruganan, ug sa iyang pagka lider sa Kongreso.

Karon nga mihilom na ang presidente, si Inday Sara ang nagsige og labtik. Sumala pa nga si Presidente Rody na mismo ang nakig-estorya sa duha aron mohilom na kay bati paminawon kon mag-unay sila.

Apan makapugong ba kaha si Inday Sara?