Isunod si Rama?

Human sa pagpatay sa abogado ug bise mayor sa lungsod sa Ronda nga si Jonnah John Ungab, adunay tarpaulin nga gibitay sa usa ka skywalk sa dakbayan sa Sugbo nga nagpahayag nga si kanhi mayor Michael Rama maoy sunod nga ilikidar.

Sa maong tarpaulin, makita si Rama nga maoy nagpahural kang kanhi Albuera, Leyte mayor Rolando Espinosa Sr. isip bag-o nga miyembro sa United Nationalist Alliance. Anaa usab sa maong hulagway si Ungab isip usa sa mga witness sa maong oathtaking.

Nahibalo na kita nga sa maong hulagway, duha na ka tawo ang gipatay. Si Espinosa didto gilikidar sa iyang selda sa Leyte Sub-Provincial Jail sa Baybay City, samtang si Ungab giambus paggawas sa Cebu City Hall of Justice human kini mitambong sa hearing ni Kerwin Espinosa isip iyang abogado.

Ug sama kang Espinosa Sr. ug Ungab, starring usab si Rama sa listahan ni Presidente Rodrigo Duterte sa mga local officials nga iyang giingong nalambigit sa negosyo sa ilegal nga druga.

Haskang kisikisi ni Rama ug hangtud niining panahona, naningkamot kini nga makigkita kang Duterte aron kuno nga malimpiyohan ang iyang ngalan.

Hinuon dili usab maayo nga binuang kadtong pagbutang sa maong tarpaulin, kay simbako kon matinuod kadto ug adunay daotan nga mahitabo sa kanhi mayor, dili nato malikayan ang magduda nga basin kon adunay kalambigitan ang estado sa maong panghitabo.

Bisan kon binuang lang kini, ang pagbutang sa maong tarpaulin klaro nga nagdala og hulga sa kinabuhi ni Rama, kay simbako kon sakyan kini sa uban kinsa nagtanom og personal nga kayugot kaniya ug ipahid lang sa alegasyon sa druga batok kaniya.

Dili nato mabasol si Rama nga mobasol usab kang Duterte kon ugaling aduna kini mga hulga sa iyang kinabuhi. Hangtud nga dili limpiyohan sa presidente ang iyang ngalan, pabilin nga mora’g sundang nga nagbitay ibabaw sa iyang ulo ang alegasyon sa druga.

Daghan ang nakapaniid nga nagpinal na ang polítical career ni Rama tungod lagi sa akusasyon nga usa kini ka drug protector ug nga lisud na kini nga makabangon pa. Karon, mas dako nga problema ang hulga nga siya kuno ang sunod nga idispatsar.