Ungo midunggab sa budyong

Nakaangkon og dili momenos napulo ka samad dinunggaban ang usa ka lalaki sa dakbayan sa Lapu-Lapu niadtong nakalabay’ng semana.

Maayo na lang kay nadali siya sa pagdala sa tambalanan ug nakasugakod gyud sa pagpakabuhi. Ang nanunggab, higala ra usab sa biktima kinsa mitahan sa kapolisan human sa gihimo niya nga krimen.

Ang hinungdan ra gyud sa dugoon nga hitabo mao ang komedya sa biktima, kinsa mihingalan sa suspek nga usa ka ungo.

Sa sinugdanan nakaya ra sa gisungog, gani mobalos usab siya pagkomedya nga mora usab kuno og budyong, o matang sa kinhason, ang dagway sa iyang higala tungod kay mas bati pa kuno og nawong kon itandi kaniya.

Matud sa nakadunggab nga dili lang kausa ka higayon nga gitawag siya og ungo sa iyang amigo, kadaghan na gyud kuno, ilabi na kon adunay daghan nga makadungog.

Giseryuso diay sa higala ang komedya kay niabot na man sa punto nga dili na siya makatulog sa paghunahuna kon nganong tawgon man siya og ungo.

Niawas na ang gantangan sa iyang pasensya ug gidaog na siya sa tumang kasuko ug napaundayonan niya ang pasangil nga usa siya ka daotan.

Napanglimotan na kuno siya nga daw nisakop na sa iyang pagkatawo ang paghingalan kaniya nga ungo. Gigukod niya ang higala kinsa niadtong higayona gipakasama na niya sa usa ka budyong. Gihansakan niya’g kutsilyo sa makadaghan nga higayon.

Ulahi na ang pagbasol sa maong tawo tungod sa ka mabaw niya og pasensya. Karon, napriso na hinoon siya. Sa samang higayon, ang nadunggaban mas labaw ang pagbasol kay tungod sa iyang kasungogan, hapit na hinoon siya mamatay.

Dako kining leksyon nga kapanaminan sa mga tawong mahilig kaayo manungog.