Pagkiyugpos ug pagtak-omn
ARANGKADA - Leo Lastimosa (Banat) - February 24, 2018 - 12:00am

Naigo ko sa wali sa dakong opisyal sa Catholic Bishops Conference of the Philippines (CBCP) niadtong Miyerkules Badlis, nga usa sa labing dakong krimen nga nahimo sa katawhan sa atong panahon mao ang pagpakahilom.

Inay mopadayag og pagsupak sa dili maayo nga mga panghitabo, o bisan pagpadayag na lang sa atong baruganan sa mga panghitabo sa atong palibot, gipili nato ang pagtak-om.

Inay magpakabana, gipili nato ang pagpangiyugpos. Gikumbinser nato ang atong kaugalingon nga pinaagi sa dili pagpanginlabot atong nalikayan ang dugang lalis. Apan dakong sala ang wa paghimo sa angay’ng himuon.

* * *

Tungod sa akong pagka magsisibya, mas daghan ang akong kahigayonan sa pagtuki ug pagpadayag sa akong baruganan sa nagkalainlaing mga panghitabo sa Sugbo, sa nasud ug sa kalibutan.

Mahimo ra gyud ko nga managang nga dili ka mahimong ilumpong sa mga nagpakahilom.

Apan, kay kuwaresma na man gyud, tugoti nga mokumpisal ko nga may mga higayon nga ang ako ra nga hisgotan sa inadlaw nako nga sibya sa radyo ug lindog mao ang labing sayon nga mga isyu, nga dili ko mameligro nga masugamak og binastos nga mga pagsaway tungod sa akong baruganan.

* * *

Dili na ko makahinumdom sa katapusang higayon nga gipalawoman gyud nako paghisgot ang extrajudicial killings. Tingali tungod sa kamingaw sa reaksiyon sa publiko, o sa padayong pagpanglaktod sa balaod sa mga polis ug vigilantes, o sa organisadong kampanya pagpakauwaw ug pagpanghudlat sa tanang mokuwestiyon sa kabangis sa gubat batok sa ilegal nga drugas, gipili nako ang ubang mga kontrobersiya nga mas makapangisog sa akong baruganan.

Mao nga sa sunudsunod nga mga patay, igo ra nga gituki ang nabutyag nga mga detalye sa mga operasyon sa kapolisan. Sa wa’y pagsubay sa tinuoray’ng tinubdan sa kapintas nga mao ang kinatas-ang ang-ang sa kagamhanan.

* * *

Nikatawa ko sa mga bugal-bugal ni Presidente Duterte inay maningil sa pagpatigbabaw sa kaligdong sa iyang buhatan. Nilikay paghisgot sa bastos nga mga panginsulto, gipili ang pagtuki sa giisip nga mas mapuslanong hilisgotanan, inay pagbuyag sa paghugaw-hugaw sa demokratikanhong mga institusyon.

Apan dili mahimong magpaundayon sa dili pagbuhat sa angay’ng buhaton. Mao nga nikuyog ko sa Walk for Life with Mary gikan sa Fuente Osmeña paingon sa Cebu Metropolitan Cathedral ganinang kadlawon.

(leo_lastimosa@abs-cbn.com)

Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with