Alvarado hayan sunod makontra ni Pacquiao

CEBU, Philippines — Nagkahayag na ang posibilidad nga ang Amerikanong boksidor nga si Mike Alvarado maoy makaharong ni Manny Pacquiao sa giatngan nga comeback fight sa Pinoy ring star.

Kini bisan pa man sa lab-as nga pamahayag ni Pacquiao nga gusto niyang makontra sunod  si Lucas Matthysse sa Argentina nga bag-o  lang gikoronahan nga WBA welterweight champion.

Matud pa ni Arum nga hapit na niya mapinalisar ang kasabotan sa away tali nilang Pacquiao ug Alvarado.

Kabahin kini sa giplano niyang double-header didto sa Las Vegas diin ang wa’y pildeng si Terence Crawford ug WBO welterweight champion Jeff Horn magbinukbukay.

Gikatakda karong Abril 14, ang gihikay nga pasundayag ni Arum ipasalida pinaagi sa ESPN pay-per-view.

Gilantaw sa pipila ka mga batid nga ang 37-anyos nga si Alvarado (38-4, 26KOs) haom kaayo aron iparang ni Pacquiao. Wala kini kahadlok nga makighilam-osay og kumo sa iyang mga kaatbang  nga mao sa’y kinaham  sa bugtong eight-division world champion nga nagsilbe karon nga senador sa Pilipinas. (BANAT NEWS)