Mga benepisyosa luy-a (1)

Hinginom ka ba og luy-a nga tsa? (ginger tea) Kon mao, ania’y maayong balita alang kanimo kay aduna kini daghang makapahingangha nga benepisyo sa imong panit ug sa katibuk-ang kahimsog sa panglawas.

Ang luy-a, usa ka herbal ug gigamit kanunay nga pang-alibyo didto sa Tsina ug sa India. Gikuha kini gikan sa tanom nga ‘Zingeber officinale’. Usa ni sa gitamod nga medisina sa panambal nga Ayurveda (indian medicine). Giisip kini nga gamot, pero usa ni ka saha nga ‘rhizome’. Isip usa ka lamas, dugay na sab kini nga gigamit 4,000 ka tuig na ang nilabay, hangtud karon.

Ang medisinal nga hiyas sa luy-a, nadiskubre diha na sa 2,000 ka tuig ang nakalabay. Matud sa ‘National Library of Medicine’, ang luy-a gigamit na sa tibuok kalibutan, sa natural nga pag-alibyo sa pagkahilo o kalipong (nausea), wa’y gana sa pagkaon, kasukaon ilabi na’g human sa operasyon o tungod sa medikal nga tambal sa kanser, nag-alburoto’ng tiyan, dagaton, butod (flatulence), sakit sa tiyan (colic). Sa pagkakaron, gigamit na ang luy-a nga ingrediyente halos sa tanang  produkto, mga suplemento, ug pahimsog nga ilimnon.

Sa Ayurveda nga panambal, ang benepisyo nga makuha sa luy-a, giisip nila kini nga tinubdan sa ilang medisina, gumikan sa makahimsog nga kaayohan. Ang kaepektibo sa luy-a sa pag-ayo ug sa pagsanta, maoy gamit kaayo sa nagkalainlaing gipamati nato sa lawas. Sama sa mga mosunod;

* Problema sa baga — Tungod sa sangkap niini nga ‘antihistamines’, epektibo kini sa ‘allergy’. Mopaluag kini sa agianan sa pagginhawa ug pagtabang nga igawas ang ‘mucos’ o plema. Dugay na kini sa karaan pa, ang paghupay sa sip-on ug hilanat. Ang usa ka kutsara sa duga sa presko nga luy-a (ginger juice) ug honey, makahupay na ni, ingon man sa ubo, sakit sa totunlan, ug sa nagping-ot nga ilong.