Sa sanay pansoy

Gidapit ko ni Konsehal Elmer Ceniza kay pangilin man sa Mahal nga Birhen Maria sa Lourdes. Tuod man naabot ra gyud ko didto ug gihimo ang pagbendisyon sa mga masakiton ug sa groto nga kun wa ko masayop mga 100 steps gyud tawon. hangak dinhi ug hangak didto. Apan didto sa taas imong masinati ang mabugnaw nga huros sa hangin. Tungason kini ug kun gamiton nato ang simbolo sa bisan unsang tungason nagpahinumdom kini nga hapit na gyud diay ang kwaresma diin kada usa nato ang gidasig sa pagtungas sa atong bukid sa pamalandong ug pagpakahilom. Saba na kaayo ang kalibutan sa materyalismo ug pluralismo nga tungod niini ang matag tawo mamahimong allergic sa kahilom. Pag-uli nako sa akong lawak niadtong gabhiona, gitutokan nako ang krusipiho ug nahinumdom ko nga sa dihang gihilogan nako ang mga tawo kay World Day of the Sick man, nakaalinggat ko nga sama sa mga gihilogan ako usab nagpangita og kaayohan gikan sa makaalim nga hikap sa Dios.