Mga saag nga anghel

Drama sa DySS Super Radyo Cebu nga inyong madunggan matag buntag giulohan og “Mga Saag nga Anghel.” Mitukma sa mga panghitabo sa atong palibot diin ang mga bag-ong tubo nangasaag sa ilang pagsubay sa tul-id nga dalan. Hinungdan nga ang maong ulohan, akong gihulaman.

Hinuon, dili pareho ang sugilanon sa drama sa radyo nga inyong nadungog ug madunggan pa, ug ning akong lindog nga inyong mabasa, kay ang sa radyo nag-asoy og gugma samtang kining akong lindog mag-asoy og suliran sa katilingban.

Matud sa kapolisan nga subra upat ka libo ka batan-on nga gikonsiderar nga “persons appeared” ug sa maong gidaghanon kapin sa 400 kanila ang nadakpan tungod sa pagkalambigit sa paggamit, ug pagpamaligya’g ginadili nga drugas.

Ang kapitan sa Pajo, Lapu-Lapu City nga si Jonard Chan naalarma sa grupo sa mga batan-on nga mga sakop sa gang nga magtapok matag gabii sa iyang barangay, tungod kay sa kalinghod pa sa ilang pangedaron nakighilawas na kini sa ila ra usab nga kauban sa gang.

Nasayran sa kapitan nga apil sa patakaran sa pagkasakop sa gang mao ang pagpakighilawas sa ilang kauban. Tungod niini, may mga sakop na sa gang nga nataptan og sexually transmitted infection, nasira na.

Gimando usab ni Mayor Tomas Osmeña ang estrikto nga pagpatuman sa curfew ordinance sa siyudad human madawat ang taho nga daghang batan-on ang naglatagaw bisan sa lawom na nga kagabhion.

Ang mga batan-on sakop usab sa gang diin ang mahimo nilang bag-ong sakop, pasoan og sigarilyo. Apan gibakwi ni Mayor Osmeña ang iyang kamandoan human masayri nga wala’y kabutangan sa mga batan-on nga mahipos.

Ang gobiyerno kinahanglang mohimo og dinaliang lakang sa pagpahibalik ngadto sa tul-id nga dalan niining mga nasaag nga anghel ug ang ilang mga ginikanan, kon mahimo silotan.