Kinahanglang adunay pinirmahan nga kasabotan kon magbaligya og yuta
Dear Atty. Divine,
Ang akong amigo mitanyag nako sa pagbaligya sa iyang basakan sa ubos ra nga presyo. Mihatag ko niya og down payment nga 20% sa selling price, apan wa mi gipirmahan nga kontrata pulos lang oral.
Nagsabot mi nga before October of this year, akong bayran in full ang iyang basakan. Ang akong pangutana kon iyang ibaligya og lain ang property, makagukod ba ko niya? Unsa ang angay nako nga buhaton aron dili niya mabaligya og lain ang property? Daghang salamat. —Samuel
Dear Samuel,
Base sa atong balaod, kon ang agreement may kalabutan sa pagbaligya og real property, kinahanglan gyud nga may kasabutan mo in writing, ug dili lang pulos oral. Kini base sa Article 1403 ( Statute of Frauds) sa atong New Civil Code. Kon pulos oral or verbal ang inyong kasabutan, dili kini nimo mahimong idangop sa korte aron ipatuman ang inyong nasabutan kay ang atong balaod nagmando man gyud nga kinahanglan adunay kasabutan in writing nga pinirmahan sa matag habig, kon kini may labot sa real property.
Busa kon ibaligya sa laing tawo ang basakan sa imong amigo maglisud ka sa paggukod niini kay wa man kay gikuptan nga dokumento as proof nga imo na siyang gibayran og 20%. Ang maayo nimong buhaton, estoryahan nimo ang imong amigo nga pun-an nimo ang downpayment ug adto mo sa abogado aron magpirmahanay mo og Deed of Conditional Sale alang sa maong basakan nga iyang ibaligya diha kanimo. Thanks and God bless.- Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest