EDITORYAL - Kontrobersiya sa navy frigates

Nalawgaw karon ang pagpalit sa Pilipinas og brand new nga missile-armed frigates gumikan niining mga akusasyon nga pagpanghilabot sa pipila ka mga opisyal sa Malacañang. Ang maong kontrobersiya mitumaw human adunay usa ka “white paper” nga miakusar kang Presidential Special Assistant to the President Christopher “Bong” Go nga nanghilabot sa procurement sa combat management system (CMS) para sa duha ka frigates nga paliton sa DND sa South Korea.

Matud pa gipaboran niya ang usa ka supplier sa CMS ug dili ang napili sa Navy. Kini usab ang giingong hinungdan kon nganong giparelibohan ni Defense Secretary Delfin Lorenzana ang flag officer nga si Vice Admiral Joseph Mercado. Si Bong Go nanghimakak nga nag-apil-apil siya sa maong transaksiyon ug mituo usab niini sila si Lorenzana ug Presidente Duterte.

Karon nagklarohay na nga wala manghilabot si Bong Go, apan nganong nagpadayon man kining isyu sa pag-insister nga pilion kadtong CMS nga dili gusto sa Navy? Dili ba mas maayong paminawon nila ang tingog sa Navy nga maoy naghimo og pagtuon sa sinugdanan pa lang sa pagplano kon unsa’y palitong barko ug mga gamit nga ibutang niini?

Gibase man nila kini sa ilang gikinahanglan ug makaya sa budget, ingon man kaya nilang mentinahon apan makaparang sa ubang modernong Navy. Ang mga tawo nga nagpili niini, mga eksperto sa Naval combat systems, busa mas maayong sila maoy paminawon, ug dili ang mga “nag-lobby” aron paboran ang usa ka butang nga dili maoy gusto sa Navy.

Ang gilalisan nga CMS mao ang Naval Shield of Hanwha Thales sa South Korea ug Thales Tacticos of Netherlands. Ang Tacticos maoy gusto sa Navy tungod kay mas moderno ug makaparang, ingon man gigamit kini sa kadaghanang Navy sa kalibutan, samtang kining usa, ang South Korean Navy ra’y nigamit. Kining modernisasyon sa Armed Forces of the Philippines nagsugod pa sa panahon ni kanhi presidente Fidel V. Ramos apan sa paglingkod ni Aquino pa kini nasugdan og pagpamalit tungod sa hulga sa China.