Higala nga gamhanan

Nanglimbawot ang akong balhibo samtang nagpaminaw sa giasoy sa beteranong media personality sa Sugbo, Rene Borromeo, o Renbor sa iyang mga higala, mahitungod sa milagro sa Balaang Bata nga iyang nasinati mokapin sa duha ka dekada na ang nakalabay.

Kinsa may tawo nga mabuhi kon malatayan sa ligid sa higante nga sakyanan? Maka-survive man seguro apan baldado, kay magupok man gyud ang tiil nga maigo sa ligid. Apan wala’y imposible sa milagro ni Señor Sto. Niño nga gipamatud-an ni Renbor, sanglit siya man ang tawo nga akong gihisgotan nga naligsan sa prime mover niadtong tuig 1995.

Matud niya, nga samtang diha na siya sa baba sa kamatayon, wala na’y laing pulong nga iyang nabungat, kon dili, ang pagsinggit, “Santo Niño tabangi ko!!”.

Diha-diha dayon, gidungog ang iyang pangaliya sa Batang Hesus. Igo ra nga nabatyagan ni Renbor nga nilatay ang ligid sa iyang paa. Abi niya og nagupok na ang iyang paa, apan wala kini maunsa.

Dili produkto sa iyang imahinasyon, kay ang iyang karsones nga gisul-ob sa maong higayon, nagisi man, nagpasabot nga naigo gyud siya sa ligid sa sakyanan. Ang iyang motor maayong pagkagupok, apan ang iyang lawas wala’y tatsa.

Dili ang lawas ni Renbor ang lig-on, itandi sa puthaw, apan ang gahum sa iyang Friend maoy lig-on niyang taming gikan sa disgrasya. Usa lang si Renbor sa nakasaksi ug nakasinati sa milagro ni Señor Sto. Niño.

Ako lang ipaambit ang mubo nakong kasinatian ning bag-o lang samtang paingon ko mag-newscast didto sa Basilica. Na-empty battery ang akong cellphone ug power bank nga maoy gigamit nako nga monitor ug basahan usab nako sa news script.

Wala’y laing kasaksakan sa battery sulod sa Pilgrim Center, apan dihang nangaliyupo ako ni Sto. Niño nga mo-function ang akong power bank, diha-diha nga gihatag niya ang akong gipangayo.

Daghan salamat, higala nga gamhanan! Viva Pit Senyor!