Unsay benefits sa PWD?

Dear Atty. Divine,

Ang akong iyaan nga naminyo og Canadian citizen, gusto na nga mobalik og puyo dinhi sa Pilipinas, kay dili siya kaagwanta sa weather sa Canada nga bugnaw kaayo.

Dugay na ang akong iyaan nga dili kalakaw tungod sa iyang diabetes ug duna na sab siya’y gi-maintain nga tambal. Ang akong pangutana, kon pwede ba nga mokuha og ID sa PWD ang akong iyaan aron siya maka-discount sa iyang mga medisina?

Unsay lain niyang ma-avail nga discount, gawas sa tambal? Ang iyang bana nga Canadian citizen nga physically handicapped usab,  mahimo ba sab nga makakuha og PWD ID aron maka-avail sa discount? Daghang salamat. — Lea

Dear Lea,

Base sa Republic Act 10754, alang sa mga Persons with Disability (PWD), exempted sila sa Value Added Tax sa produkto nga ilang paliton ug aduna sab sila’y 20% discount  sa mga medicine ug sa medical ug dental services, lakip na sa mga diagnostic and laboratory fees ug professional fees sa mga doctor.

Mas maayo nga mokuha og PWD ID ang imong iyaan aron siya maka-avail sa discount ug mga prebilihiyo sa mga PWD, base sa maong balaod.

Samtang sa iyang bana nga usa ka Canadian citizen, dili siya maka-avail niini kay ang maong balaod alang ra sa mga Filipino. Thanks and God bless. —  Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.