Kinsa ang angay’ngmo-custody sa bata nga illegitimate?

Dear Atty. Divine,

Duna ko’y 2-year old son sa akong kanhi boyfriend. Dihang nagbuwag mi last year, mibiya ko sa among gipuy-an ug ako unta dad-on ang akong anak, apan wa kini ihatag sa akong ex-boyfriend ug mihulga siya nga maghikog kon akong pugson og dala ang bata.

Tungod niini, napugos ko sa pagbilin sa akong anak ngadto kaniya. Niadtong Disyembre, mikontak ko sa akong ex-boyfriend kay gusto nako nga kuhaon ang akong anak human nako mahibaw-i nga gibilin niya ang bata sa probinsya uban sa iyang mama.

Apan miingon ang amahan sa akong anak nga dili na kuno nako makuha ang bata ug maayo na kuno ang kahimtang niini didto sa ilang probinsya. Apan gusto nako nga kuhaon ang bata ug ako ang moatiman kaniya. Unsay angay nako nga buhaton? Daghang salamat. — Che

Dear Che,

Base sa balaod, kon ang bata illegitimate, ang inahan niini ang dunay katungod nga mo-custody sa bata, gawas lang kon siya unfit kay iyang gi-abandon ang bata o gimaltrato ang bata, and other compelling reasons nga makapa-unfit sa inahan.

Apan sa imo nga kaso gusto unta nimong dad-on ang imong anak apan wa ihatag sa imong ex-boyfriend ug karon nga gusto na nimong kuhaon, dili na sab ihatag sa amahan ang imong anak, ug tua kini niya gipaatiman sa iyang inahan sa probinsya.

Ang maayo nimong buhaton mao ang pagkuha og abogado aron padad-an og demand letter ang imong ex-boyfriend. Kon dili gyud niya i-turn-over ang bata kanimo bisan kon gipadad-an na siya og demand letter, then modangop na gyud ka sa korte alang sa pagkuha sa imong anak. Thanks and God bless. — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.