Kalit nga miatras sa ilang kasal
Dear Atty. Divine,
Ang akong igsuon adunay gikarelasyon nga foreigner. Niadtong miaging tuig mibisita sa Cebu ang foreigner ug nananghid kini sa among mga ginikanan nga iyang pangasaw-on ang akong manghud.
Misugot ang akong mga ginikanan kay miuyon man sab ang akong manghud ug karong tuiga unta sila magpakasal. Apan kalit lang nga nausab ang desisyon sa akong manghud ug dili na kini gustong magpakasal sa foreigner.
Apan nasuko ang iyang boyfriend kay dako na kuno siya og gasto sa preparasyon sa ilang kasal ug iya na nga nabayran ang ubang galastohan niini.
Ang akong pangutana kon makapugos ba ang foreigner sa akong manghud sa pagpakasal kaniya? Unsay legal nga lakang nga mahimong buhaton sa foriegner batok sa akong manghud? — Mark
Dear Mark,
Dili makapugos ang foreigner sa imong manghud sa pagpakasal kaniya kay base sa balaod, ang consent o pagtugot sa magtiayon nga gustong magpakasal kinahanglan nga boluntaryo kining ihatag sa party nga involve, so dili mahimo nga pugson ang imong manghud sa pagpakasal.
Dili sab mahimong kabasehan sa pagpasaka og kaso sa foreigner batok sa imong manghud ang iyang pagdumili sa pagtuman sa saad niini nga pagpakasal kaniya. Apan kon naandam na sa foreigner ang tanang preparasyon og nabayran na niya ang tanan unya kalit lang miatras ang imong manghud sa wa’y igong rason, then mahimo siyang ikiha og damages sa foreigner tungod sa damyos nga iyang nahimo. Thanks and God bless. — Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest