EDITORYAL - Interes sa mga pilipino
Edwin Ian Melecio (Banat) - May 5, 2017 - 12:00am

Gituldokan na sa Commission on Appointments  (CA) ug gibasura ang appointment ni Gina Lopez pagka kalihim sa DENR nga mao unta’y gusto ni Presidente Duterte tungod sa iyang kaisog ug pagka-environmentalist. Base sa pagkabahin sa botos nga 16-8 pabor ngadto sa mga mining firms, nakaingon si Lopez nga nipatigbabaw gyud ang “business interest” inay nga ang interes sa kinabag-ang Pilipino nga maapektohan sa kadaot sa kalikupan nga gibilin sa dagkong minahan.

Bilyones pesos ang kantidad nga kitaon sa mga minahan ug ang gobiyerno nakakolekta niini og buhis, ug daghan usab ang nakatrabaho sa mga minahan. Apan kining mga minahan, ilabi na kadtong mga large scale mining operations, nagbilin og uwat sa kaniadto tambok kaayo nga yuta tungod sa pagkawot, paghabwa sa yuta, graba ug mga bato diin nasagol ang minerales sama sa bulawan, nickel, coal ug uban pa.

Ang resulta, kadtong tambok nga mga yuta nga diin mabuhi ang mga tanom natabunan ug nabanlas. Gipamutol ug gipanglarot usab ang mga kahoy. Kay ang yuta nga hinabwa gikan sa ilawom dili man susama katambok sa anaa sa ibabaw, ang resulta dugay kaayong motubo ang mga tanom kun kini tamnan pag-usab.

Gimando kaniadto ni Lopez nga pasirad-an ang dul-an sa 30 ka dagkong minahan sa nasud tungod sa wala pagtuman sa mga balaod sa pagmina hinungdan nga apektado sa ilang operasyon ang kalikupan. Giklaro baya daan ni Lopez nga ang iyang kampanya dili anti-mining, kun dili, adbokasiya lang batok sa ‘destructive mining’ nga mao karon ang gihimo sa mga dagko nga minahan.

Ang Konstitusyon nag-ingon nga katungdanan sa gobiyerno nga isiguro ang katungod sa katawhang Pilipino sa pagpuyo sa limpyo ug luwas nga kalikupan. Maayo unta nga ang mga magbabalaod nga nibabag sa pagkatudlo ni Lopez isip DENR Secretary mosiguro gyud nga interes sa mga Pilipino, ug dili sa mga negosyante, ang sentro sa ilang gihimo.

EDITORYAL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with