Simbolo sa pagtuo
Nipasalig ang kadagkoan sa Simbahang Katoliko nga bisan usa pa ka milyon ka Presidente Rodrigo Duterte, dili makaguba sa simbahan. Mao ni ang ilang tubag sa panganti ni Duterte nga tungod sa kadaghan sa mga abuso sa kaparian, mapapas na ang simbahan sa mosunod nga 30 ka tuig.
Matud sa mga obispo, daghang nisuway apan pulos napakyas pagguba sa simbahan sa niaging duha ka libo na ka tuig. Apan niinsistir si Duterte nga ang kahilas ug pagpakaaron-ingnon sa simbahan maoy hingpit nga makapahagba sa institusyon.
* * *
Bisan sa hapit matag adlaw nga pagpanaway, pagpanginsulto ug pagpamalikas ni Duterte batok sa mga obispo ug kaparian, padayong magpanon ang mga Katoliko sa mga simbahan karong adlawa aron sa pagtuman sa obligasyon sa pagsimba, nga maglakip sa pagpaminaw sa mga wali sa kaparian.
Sa pikas nga bahin, bisan sa kusganong pagpanaway sa Catholic Bishops Conference of the Philippines (CBCP) sa laktod nga mga pagpamatay sa gubat batok sa ilegal nga drugas ug sa paningkamot pagbanhaw sa silot sa kamatayon, nagpabilin ang taas nga popularidad ni Duterte ug sa iyang gubat sa drugas.
* * *
Mahimong popular si Duterte apan dili pa andam ang kinabag-an sa katawhan pagtalikod sa Simbahang Katoliko. Mahimong nalingaw ang katawhan sa mabulukon niyang mga pakigpulong apan wa sila motuo sa iyang pagtunglo sa kaparian ug sa kadagkoan sa simbahan.
Sa pikas nga bahin, mahimong padayon nga nagtamod ang katawhan sa mga obispo ug kaparian sa Simbahang Katoliko, bisan sa mga pangabuso sa pipila, apan dili pa sab sila andam nga mobakwi sa ilang suporta ni Duterte ug paghatag niya sa tanang kahigayonan pagpatuman sa iyang gisaad nga kausaban.
* * *
Natabonan sa masuk-anong pagkutlo ni Duterte sa librong “Altar of Secrets” parte sa pangabuso sa kaparian ang sayop nga iyang gisangyaw: Gihulagway niya ang magsusuwat nga si anhing Aries Rufo nga opisyal sa CBCP; ang tinuod mao nga si Rufo peryodistang nagsubay sa mga kontrobersiya sa simbahan.
May nabutyag hinuon nga kamatuoran sa hulagway sa pagsaulog ni Duterte sa iyang birthday uban sa iyang mga apo sa niaging semana: Padayong gipasundayag sa labing bantang nga bahin sa iyang kuwarto ang dakong krus — ang labing gamhanang simbolo sa pagtuo.
- Latest
