Karon na ang panahon

Ting-init na gyud. Angay na unta nga motrabaho ang atong kagamhanan sa dakbayan sa Sugbo aron pagsulbad sa problema sa paglunop ug pagbaha sa mga lupa nga dapit sa siyudad. Kini aron nga kun moabot na ang ting-ulan, sulbad na ang problema.

Apan mura’g wala pa niini makapangandam ang City Hall. Mura’g na-busy tingali si Mayor Tomas Osmeña sa ubang gimbuhaton, ilabi na ang paggukod sa mga magpapatigayon nga wala mamayad og buhis sa atong dakbayan.

Ang eskina Bonifacio ug Sikatuna Streets maoy kanunay’ng lunopan sa tubig kun mobunok na ang ulan. Kini tungod kay ang sapa nga anaa mahimutang sa maong dapit nahimo na lang kanal tungod sa mga mapahimuslanon sa higayon. Nganong dili man nato kana panggub-on?

Adunay karaang mapa nga gitipigan ang dakbayan sa Sugbo nga magpakita sa karaang gidak-on sa atong waterways, apan tungod sa kahakog og puwesto sa mga magpapatigayon ug tag-iya’g panimalay, ang lapad nga sapa, migamay.

Kanang nagnegosyo og mga puthaw ug scrap nga puthaw diha sa dalan Sikatuna, apil nga nakapasakripisyo ug nakapagamay sa sapa dihang dapita. Gawas nga gipagamay nila ang sapa, giukopar pa nila ang aseras nga gibutangan nila kanunay og mga puthaw ug ilang mga sakyanan.

Ambot nakakita ba kaha niini si Mayor Osmeña ug ang iyang mga sinaligan sa City Hall nga adunay gahum sa pagsulbad sa problema sa lunop dihang dapita.

Kun kinsa man ang “in-charge” sa pagsulbad niining maong problema, palihug, bisitahi ang maong lugar. Kun wala mo masayod niini, ayaw kataha kay ubanan ko kamo aron tudloan sa mga dapit nga angay ninyong aksiyonan.

Usbon nako pagpasabot nga kun dili nato aksiyonan ang mga abuso sa katawhan, sa pagpanglabay sa katuigan, wala nay sapa nga kaagian sa tubig ug masinati nato ang kanunay’ng paglunop.

Nakakita ba kamo sa sapa nga molagbas unta sa M.J. Cuenco Avenue paingon sa Barangay Carreta? Wala nay sapa kay gipuy-an na man sa katawhan. Resulta, maglunop dihang dapita kun mag-ulan.

Kanus-a pa man kamo molihok? Unya na kun mahuman na ang ting-init, ug muabot na sab ang ting-ulan?

* * *

Diri sa eskina D. Jakosalem ug Colon, problema kaayo sa trapiko panahon sa hapon. Unsaon, gisirad-an man ang usa ka bahin sa karsada tungod niining proyekto nga paghimo’g sapa.

Sayop nga proyekto sa DPWH ug maisip nga pag-usik-usik ra sa kuwarta sa kagamhanan. Ang mga opisyal sa dakbayan sa Sugbo, utro pa nga wala magpakabana niini, kay wala sila masayod sa tinuod nga sitwasyon.