EDITORYAL - Di gyud gustong mouli

Ang lainlaing pagsabot sa balaod ug ang pagkamasinupakon sa lehitimo nga kamandoan, maoy nakamugna og kaguliyang sa pag-imbentaryo sa mga sakyanan sa Cebu City Hall.

Sa pag-imbentaryo hinuon mahimong dili na balikan og sakyanan kadtong ubang tawo nga giisyohan sa kanhi administrasyon bisan og dili sila kapitan sa barangay, sama ni Konsehal Rudy Tabasa sa Labangon.

Kaniadtong Biyernes sa gabii, gidakop gyud sa mga kawani sa General Service Office, inabagan sa kapolisan si Konsehal Tabasa tungod sa wala niya pag-uli sa sakyanan nga giisyu kaniya.

Ang palusot nga argumento ni Konsehal Jose Daluz III, alyado sa Team Rama, mao nga wala gyud kuno makadawat si Tabasa og memorandum nga nagmando kaniya pag-uli sa sakyanan ngadto sa City Hall. Giangkon hinuon ni Daluz nga nasayod sila sa pag-isyu ni acting mayor Margot Osmeña sa maong memorandum.  Maklaro kaayo ang kagahi lang gyud nila’g mga ulo nga gamay’ng butang pangitaan pa gyud og rason para lang gyud nga magpabilin kanila ang sakyanan nga iya sa City Hall.

Nagtuo gyud tingali si Konsehal Tabasa nga dili na ibalik kaniya ang maong sakyanan kun iyang iuli kay ang sakyanan angay man gyud nga adto itugyan sa barangay kapitan, ug dili kaniya nga konsehal lang sa barangay.

Ang sipyat sab gyud hinuon sa mga staff ni acting mayor Osmeña mao nga wala gyud nila pangitaa si Tabasa, ug ang ubang opisyal sa barangay nga giisyuhan sa sakyanan aron papirmahon nga nakadawat sila sa memorandum aron lig-on ang ebidensya. Ang kapakyas sa mga opisyal sa kagamhanan pagtugyan pagbalik sa mga butang sa gobiyerno nga gipiyal kaniya kun kini idemanda sa usa ka competent authority, maigo sila sa balaod ubos sa Section 221 sa Revised Penal Code.

Apan makahimo og lig-ong argumento ang mga hingtungdang opisyal kun wala gayud sila makadawat sa memorandum nga nagmando kanila pag-uli sa sakyanan, bisan og nadunggan na nila kini gikan sa mga sakop sa media.