EDITORYAL - Towing angay’ng ibalik pagpatuman

Ang kaharuhay sa pipila lang ka tawo, dili angay’ng ibaylo sa sakripisyo nga nasinati sa labing daghan.

Wala malilong sa kadaghanan nga ang dakbayan sa Sugbo, ingon man ang ubang kanait nga dakbayan, nakasinati og grabeng problema sa trapiko tungod sa pagdagsang sa mga sakyanan. Mga yano nga tawo nga kaniadto maglakaw lang ug mosakay ra og passenger jeepney, karon nakapalit na og mga sakyanan tungod kay daghan na nga mga baratong sakyanan.

Base sa statistics sa Land Transportation Office (LTO) nga dul-an na sa 700 mil ka sakyanan, apil ang mga motorsiklo, narehestro dinhi sa Central Visayas ug kadaghanan niini ania sa Sugbo magdagan.

Usa sa nakapasamot sa problema sa trapiko mao ang kaabusado ug kaignorante sa balaod sa ubay-ubay’ng mga drayber. Pataka lang og parking sa ilang mga sakyanan daplin sa karsada ug tungod niini nakahasol kini sa moagi nga mga sakyanan.

Daghang namalit og sakyanan apan wala sila’y grahe sa ilang mga units mao nga panahon sa gabii mapugos sila pagparking sa ilang sakyanan daplin sa karsada. Panahon na tingali nga ibalik ang pag-estrikto sa pagdili sa parparking sa mga sakyanan daplin sa karsada, ilabi na sa gagmay’ng mga dalan.

Tinuod, daghang tag-iya og mga sakyanan ang magbagulbol kun ibalik ang pagpatuman sa towing operation aron guroyon ang mga sakyanan nga masakpang gipataka lang pagparking.

Apan samtang adunay magbagulbol ug mangasuko kun ibalik ang towing, mas daghan gyud ang mangalipay kun estrikto na nga ipatuman ang pagdili sa pagpataka og parking.

Kining maong lakang dili kay angay’ng himuon dinhi lang sa dakbayan sa Sugbo, kon dili, apil na diha sa mga kasikbit nga dapit sa Metro Cebu. Angay’ng hugtan usab ang pagpanakop sa mga masalaypong drayber, ilabi na niadtong mga may sticker nga “Duterte” kay gusto man kaha sila og kausaban.