Duterte palansaron sa mga OFW ug NPA

Daghang mga Overseas Filipino Workers sa tibuok kalibotan gusto g’yud nga palansaron nila si Davao City Mayor Rodrigo ‘Digong’ Duterte sa pagka-presidente sa Pilipinas sa eleksyon sunod tuig.

Ilang gipasaligan si Digong nga kun makahukom na nga magpapili isip pangulo sa atong nasud, manguli sila ug kombinsihon ang ilang pamilya ug mga paryente nga botaran gyud nila ang isog nga mayor, kinsa gikahadlokan sa mga dautang elemento.

Sila nga mga OFW may daghang sakit nga kasinatian nga nasugatan sa gawas, diin kanunay sila nga nanawagan sa mga lider sa nasud aron tabangan. Apan kadismaya lang kuno ang sagad nila nga maangkon kay kun dili kulang ang i-ayuda sa Pilipinas, maglabi g’yud nga wala sila’y ayuda nga madawat.

Sa mga nangagi nga Presidente sa Pilipinas, labi na sa namunoan karon, wala g’yud kuno sila makatagamtam og tabang gikan sa mga lider sa atong nasud kada higayon nga silang mga OFW daugdaogon sa mga agawon nga langyaw.

Hinungdan, nga sa gipakita nga suwabe’ng pagpangalagad ni Duterte sa Davao City, diin nahimo kining No. 8 nga “safest place all over the world to reside,” gusto sila nga si Duterte na ang molingkod sa Malakanyang. Kini kay nagtuo man sila nga si Digong andam molaban sa mga dinaugdaog ingon man tig-abog sa mga anino ni Satanas.

Ang mga New People’s Army (NPA) mipasalig ‘sab nga kun molansar pagka-presidente si Duterte, andam sila nga manaog gikan sa bukid, isurender ang mga armas ug mobalik sa patag aron mosuporta niining tawo nga alang kanila mao lang ang bugtong linalang nga makapahanaw sa kurapsyon sa Pilipinas.

“If you want to have a big change in our nation, then let Digong Duterte be our next President,” awhag sa OFW nga sama sa nagbukal ug nag-agos nga mga luha nga gipaagi sa Facebook.