Lisud pildehon ang Mar-Vi

Kun dili man g’yud magpapugong sa iyang ambisyon nga magpresidente sa nasud si Senador Grace Poe, dili magkaproblema pagpangita og iyang ikapares si DILG Secretary Mar Roxas.

Kini tungod kay daghan siya og kapilian nga mahimong madawat sa masa. Usa na niini mao ang gobernador sa Batangas - si Vilma Santos Recto nga naila kaayo nga Ate Vi.

Si Governor Vilma usa sa mga buhi nga kamatuoran nga dili nimo basta-basta nga ipakaubos ang katakus sa mga artista nga misulod sa politika.

Sa iyang pagka mayor sa Lipa City kaniadto hangtud nga siya napili nga gobernador, gipakita ni Vilma nga dili lamang siya maayo moarte atubangan sa camera.

Gipakita usab niya ngadto sa iyang mga tagasunod nga anaa usab kaniya ang katakos sa pagdumala ug pagpangalagad.

Isip mayor sa Lipa City ug gobernador sa Batangas, anaa na kaniya ang tukma nga katakos ug kasinatian nga maoy mahimo niya nga giya isip ikaduhang pangulo sa nasud.

Ang kasinatian ni Ate Vi ug ni Mar Roxas usa ka perpekto nga kombinasyon nga takus modumala sa renda sa kagamhanan sa Pilipinas.

Busa sugyot nako ngadto sa liderato sa partido’ng Liberal, seryosoha ninyo ang pagpangulitawo ni Ate Vi tungod kay dako ako og pagtuo nga modaug ang ilang kombinasyon kun ayuhon lang pagdala ang ilang kampanya sa moabot nga piniliay.