Hakog nga mga ospital
Kon simbako nakalimtan na sa mga tagduma sa mga tambalanan angay silang pahinumdoman nga ang nag-una ug labing mahinungdanon nilang tahas mao ang pagluwas og kinabuhi ug pagpalambo sa kahimsog. Di ang pagtumpi og kuwarta ni pagpaburot sa ilang ginansiya. Kay nagpatuga-tuga man og tukod og tambalanan, angay silang motuman sa balaod nga atimanon ang himatyon ug seryusong pasyente sa way pagpaningil una og bayad.
Negosyo ang pagpadagan sa tambalanan. Kay kon di na lang sab moginansiya unsa may gamiton pagpalambo sa kahimanan ug mga benepisyo sa mga doktor ug mga kawani? Apan kon kinabuhi o kahimsog nay mameligro, gimandoan sila sa balaod pagkalimot una sa ilang panguwarta.
* * *
Wa did-i ang mga tambalanan sa pagpaburot sa ilang bayranan. Wa sila babagi pagpilupilo sa makadaghan uyamot nga higayon sa presyo sa mga tambal sa ilang botika. Wa sila pugngi pagpatong sa bayranan sa pasyente sa mga sangkap sama sa mga unlan ug habol.
Way silot nga ipahamtang sa mga tambalanan nga mangayo og deposito o magdumili sa pagdawat sa kasarangan nga mga pasyente. Bugtong gimando sa balaod mao nga di nila isalikway ang mga pasyente nga naghingutas, o nahulga nga mainutil, tungod lang kay way ikabayad. Kuwarta na ba lang gyo’y gipaka-bathala nga bisan kining talagsaon rang kahigayonan ila pang ihikaw?
* * *
Nanawag sa Arangkada sa DYAB ang mga tagtungod sa duha ka pasyente nga managsama og kasinatian: Ang una gibalibaran sa pribadong ospital sa Dakbayan sa Sugbo nga mabalhin sa ICU kay way ikahatag nga P20,000 nga deposito; ug ang ikaduha wa gyod pasudla sa emergency room sa pribadong ospital sa Dakbayan sa Butuan kay wa say ikabayad sa P20,000 nga deposito. Pulos kadlawong dako nga nabalibaran ang mga pasyente maong naglisod ang mga tagtungod pagpangita dayon og kuwarta. Managsamang napugos pakiglalis ug pagpangisog ang mga tagtungod, ang taga Butuan nanghulga gyod gani, una naatiman ang ilang mga pasyente.
* * *
Hinaot nga patilawon na og tagam ang mga responsable sa labing uwahing mga kaso sa Sugbo ug Butuan. Unsay silot nga gipahamtang sa Republic Act No. 8344 (An Act Penalizing the Refusal of Hospital and Medical Clinics to Administer Appropriate Initial Medical Treatment and Support in Emergency or Serious Cases)?
Ang opisyal, doktor o kawani sa tambalanan nga makalapas sa balaod prisuhon og gikan sa unom ka buwan ngadto sa duha ka tuig, o multa nga P20,000 ngadto sa P100,000, o priso ug multa, agad sa korte; apan kon ang kalapasan nanukad sa lagda o sugo sa tambalanan, ang mga tagduma prisuhon og upat ngadto sa unom ka tuig, o multa nga P100,000 ngadto sa P500,000, o priso ug multa, agad sa korte.
* * *
- Latest