Hustong pagkaon makapabatan-on

Ang hustong pagkaon maoy unang lakang sa pagpabilin nga batan-on ug kapiskay. Kun unsay ampay nimo nga kan-onon, kini makahimo o makadaut sa proseso sa imong pag-edad, matud pa sa mga sayantis. Ania kun ngano. Magkadugay, ang mabalhinon nga mga molekula (molecules) nga ginganlag 'free radical' modaut sa imong mga himsog nga selyula (cells).

Sa tinuod lang, kining way hunong pagkabun-og sa mga selyula sa imong lawas, mao gyu'y hinungdan sa daling pagkatiguwang. Suwerte kaayo, kay ang lawas nato may nakig-away sa 'free radicals' nga mao ang anti-oxidants - sa pagsanta nga dili kini makasarang sa pagdaut sa himsog mong selyula. Busa kinahanglan nga abunda sa anti-oxidant ang lawas pinaagi sa hustong pagkaon.

Ang naka apan, kay samtang kita magka-edad, magkaanam og diyotay ang  anti-oxidant sa lawas. Sa samang situwasyon, ang stress ug sige'g panigarilyo, makapadaghan usab sa free radicals sa lawas. Ug tungod ini, maghimo kini'g dakung kadaut sa lawas. Masakiton nga mora'g tiguwang na kaayo  tan-awon.

Ang mga anti-oxidant, makuha kini nato sa kanunay pagkaon sa mga lab-as nga prutas ug utanon. Apan kun maghinubra pud sa mga mantikaon, parat ug tam-is, mosamot maproblema ang lawas diin motumaw usab ang kadaut sa mga sistima sa lawas, ang pag-atake sa daghang mga sakit sama sa kanser.

Ang masustansyang pagkaon makapalig-on sa atong mga mata, pangutok, lahutay ug uban pang nga makapapiskay sa kalawasan nga maoy mopalangan sa atong pagkatiguwang. Kini ang pagpasabot ni Mary Walker sa Geogia, USA. Sama sa iyang inahan mag 60 na walay diabetes, simple ra ang gihimo nga mao ang tukmang diyeta o hustong pagkaon. Karon hapit na mag 70 kapin ang edad, abtik pa gihapon mosaka sa mga dagkung bukid sa Mount Everest.

Sa ato pa, ang sekreto nga dugay ta makapahimulos sa kabatan-on, mao ra gyud ang hustong diyeta ug ang igong ehersisyo kada-adlaw. Ang pag-ehersisyo maoy hingpit nga mopalihok sa tanang mga sistima. Nagdiyeta man apan way ehersisyong gihimo, mao ra gihapon, may mga dautang epekto nga mopasamot na hinuon nga maluya ingon sa way kalainan  sa tawong mainutil sa lihok ug sa atong panghunahuna nga kanunay hasolon sa mga gipamating daghang balatian.