EDITORYAL - Congrats sa hinigarilyo ug palainom

Aprobado na ang sin taxes o buhis  sa tabako ug alak. Ning maong terminolohiya nga  gimugna  sa  mga magbabalaod ila lang gikutlo  ang  lawom nga kahulogan  sa pagpanabako ug  pag-inom sa alak  gikan  sa Biblia.

Sa maong balaang basahon, gitino pag-ayo nga ang paghubog sa alak o bino nga makahubog  usa  ka dakong  kasal-anan  atubangan sa Dios.

Di lamang  tungod  kay  kun mahubog ang tawo makapawa na  sa iyang  pagka-desente  ug kridibilidad, kundi makahatag kini  og kadaot  sa iyang  lawas.

Susama  gihapon sa pagpanabako nga bisan di makahubog  ug  makapawandogwandog  sa tawo  ug makapawagtang  sa iyang  pagkadesente, ang epekto  sa aso  sa tabako nga gisambugan og kapin  sa 1,000  ka ingrediente dihang  gihimong sigarilyo ug iyang  gipabuhot  sa kahanginan, di lamang  siya maoy mamatay  kundi bisan  ang  ubang tawo  nga makasimhot  sa iyang aso.

Ang alak  gani  nga ang bugtong  maguba ang baga. atay  ug tinai  mao  ra  ang molala niini, daw unsa pa kaha  ang manigarilyo  na  di  lamang  ang hinigarilyo  maoy kanseron sa baga  ug tutonlan kundi  bisan  ang  ubang tawo  nga makasimhot  sa iyang aso.

Tungod kay  kini  kasal-anan sa atubangan sa Dios ug sa tawo  ug  gitawag kini  sa  mga  magbabalaod  nga kasal-anan, busa ang buhis niining  matanga sa bisyo gitawag nga buhis sa kasal-anan o sin taxes.

Karong aprobado na  ang sin taxes ,  ang unang  tuig sa buhis  nga  kitaon sa gobiyerno niini mokapin sa P33 bilyones ug matag tuig  mosaka  ang  maong  buhis hangtud  nga di kini amendahan.    Busa nanghinaot ang  tanan  nga hatagan  og  sertipiko  sa gobiyerno  ang  tanang  hinigarilyo  ug palainom og alak matag tuig  tungod  sa kadako  sa ilang  matampo  sa kuwarta  nga  gikinahanglan  sa kagamhanan  alang  sa pagpadagan  sa ekonomiya  sa nasud.

Labing maayo gani unta  nga isip bugti sa ilang kaayo librehon lang sila sa premium nila sa PhilHealth.