Total gun ban sa sinulog

CEBU, Philippines - Nagplano karon ang kapulisan nga ipatuman ang “gun ban” karon sa Metro Cebu sa umaabot nga Sinulog 2017.

Kini ang gitug-an ni Chief Supt. Noli Taliño, director sa Police Regional Office-7 nga nahinabi sa mga tigbalita.

Matud pa ni Taliño nga kini ilang gihimo aron bugtong makadala og armas panahon sa maong kasaulogan mao lang ang mga otoridad, isip kabahin sa pagpatuman sa seguridad sa dakbayan.

Si Taliño miingon nga iyang plano nga i-request sa buhatan sa PNP Chief Director General Ronald Bato Dela Rosa nga himuon ang pagpatuman sa gun ban o pagkansela sa mga “permit to carry firearms outside of residence” nga nahatag sa mga sibilyan.

Gawas sa plano nga “gun ban” plano usab sa kapulisan nga i-dili ang pagdala og “back packs” o ang pagbutang og kalo apan kini ilaha pa nga tun-an kung angayan ba nga himoon tungod kay sagad sa mga manan-aw magdala man gyud niini.

Human sa nahitabo nga pagpamomba sa simbahan sa Midsayap North Cotabato ug sa public plaza sa Hilongos, Leyte si Taliño miingon nga mas hugot nga seguridad ang ilang ipatuman aron masiguro nga luwas sa bisan unsa nga panghitabo ang dakbayan sa Sugbo atol na unya sa selebrasyon.

Gipasabot sab niya nga hangtod karon pabilin nga naka “full alert status” ang kapulisan human nahitabo ang pagpamomba sa Dakbayan sa Davao pipila ka bulan na ang nakalabay. Samtang ang direktor sa Cebu City Police Office, Sr. Supt. Joel Doria miingon nga gawas sa sakop sa kapulisan sa siyudad motabang usab sa pagbantay ang mga sakop sa kasundalohan, mga force multipliers ug uban pa nga grupo.

Alerto ang  kapulisan hangtod mahuman ang mga dagkong kalihokan sa Sugbo bisan og walay hulga nga ilang nadawat sa seguridad dinhi.

Ang pangulo sa Peace and Order Council sa Dakbayan sa Sugbo, Konsehal Dave Tumulak, nibutyag nga mas pahugtan pa gayud nila karon ang seguridad sa umaabot nga Sinulog Grand Parade human sa nahitabong pagpamomba sa Hilongos.

Matud pa ni Tumulak, nipahigayon gilayon siya og tigum tali sa Sinulog Foundation, human nahitabo sa Hilongos ug aduna silay mga kausaban nga ilang gihimo nga nagkinahanglan og pagsabot sa katawhan alang ra usab kini sa seguridad sa tawo.

Walay gitugot nga mga street parties ilabi na sa carousel route sa Sinulog aron malikayan ang posibleng mga kagubot nga motumaw ilabi na kung adunay mangahubog.

Gipaniguro ni Tumulak nga luwas gayud ang mga Sugbuanon atol sa Sinulog apan nanawagan siya sa katawhan nga motaho ug makigtambayayong sa kapulisan kung aduna silay makita nga mga bag-o o kadudahan og lihok nga mga tawo sa ilang lugar aron dali ra kini nga maaksyonan.

Awhag usab ni Tumulak sa katawhan nga kung adunay makit-an nga kadudahan nga mga butang o box diha sa ilang lugar sa pagtawag gilayon sa kapulisan bahala og false alarm pa kini aron masiguro lang nga dili kini bomba. - /EIM (BANAT NEWS)