Nakahigala og Mr. Sakto

Dear Tito Miguel,

Ako diay si Matthew, taga Consolacion , Cebu. Ganahan nako mobiya sa usa nako ka higala nga dako ang pagtoo sa iyang kaugalingon nga siya ang permi sakto . Sa higayon nga dunay discussion o hisgotan nga bisan unsa nga topic , dapat siya ang sakto. Dili siya ganahan mo-entertain sa opinion sa ubang tawo . Tungod sa iyang batasan, amo siya tawagon og Mr. Sakto.  Basta mokontra mi sa iyang opinion , masuko gyud siya . Murag siya ra ang naay katungod nga mohatag og opinyon kay lage siya daw ang sakto. Pananglitan , naa mi  friend nga nagkaproblema nga angayan hatagan og tambag , ipalabas gyud niya ang iyang tambag ra gyud ang sakto . Ang tambag sa uban namo nga friends kay sayop . Ako nani siya giprangkahan, apan wala gyud nausab. Sakto ta ba akong desisyon nga putlon nalang nako ang among panaghigalaay? Gisamokan na bitaw ko niya . — Matthew

* * *

Matthew,

Dili kinahanglan putlon, likay o distansiya lang. Hinuon duna kay bug-at nga rason, apan dili kini igo aron inyong panaghigalaay imong putlon. Tinuod nga makalagot, kay siya ra gyud ang insakto ug hawod.

Lisod na usbon, kay natural ra niya ang pagka know-it-all. Mr. Sakto, matud nimo. Wala siya’y nakitang dautan sa iyang binuhatan, busa walay angay usbon sa iyang kaugalingon. Gani, imo na giprangkahan apan walay kausaban. Pero kun di malikayan nga mag-abot gihapon mo sa tapok, kani ang buhata. Kun magsangyaw na sab siya sa iyang mga punto nga siya ra gyud ang insakto ug maayo, hilom lang mo tanan, ayaw lalis, sumpay o pangutana man lang. Kay mao na iyang gusto, ang ipamatuod nga siya insakto. Busa kun imong supakon o lalison, inyong hisgot wala’y kataposan hangtod dili siya ang mogawas nga mananaog.

Hilom lang mo tanan, pasagdi siya sa iyang pagarpar. Kay kun makabantay siya nga wa na mo maminaw, siya ra mismo ang mauwaw, moundang ug maluya. Kun dili gyud malikayan nga makasumpay mo, uyon na lang deretso. Ingna bitaw sakto ka, apan insakto na. —Tito Miguel

Magpatambag ka? Ipada kang Tito Miguel: 0991-318-9366