Ulipon sa gugma

Dear Tito Miguel,

Ako diay si Clara, taga Barangay Labangon, Cebu City. Mangayo lang ko og tambag kun sakto ba akong gibuhat nga wala nako motagad sa usa nako ka higala nga si Nicole  tungod sa makasapot niya nga binuhatan.  Ako ang magsige og tambag niya sa panahon nga brokenhearted siya kaniadto. Mohatag gyud ko og time niya basta magmaoy, kay lage mo-comfort ta. Ang uyab niya kaniadto kay nagbinuang sa ilang relasyon, iya kini nga nasakpan nga dunay laing babaye. Grabe gyud ang iyang gisulti ilabi na kun unsa ka salbahis ang maong lalaki. Apan sa niaging buwan, nahibaw-an nako nga nagkuyog-kuyog na sila og balik . Nahibaw-an  nako tungod sa "My Day" niya sa Facebook. Murag nagbalik gyud sila. Makaingon ko, wala nalang tu'y kuwenta akong mga tambag niya. Grabe siya ka marupok, wala gyu'y nada. Nadala ra siya sa tawong nagbinuang kaniya sa kadaghang higayon. Okay ra ba  akong gibuhat sa pagputol sa panaghigalaay namo ni Nicole tungod sa iyang pagka-stupid ?  - Clara -

* * *

Clara,

Dili kinahanglang putlon inyong pagka-amiga tungod lang kay iyang gibalewala imong mga tambag. Depende ra niya kun iya ba kang paminawon ug tumanon. Kay kun imong ipamugos nga tumanon ka, dili na kana tambag, mando na ang tawag ana. Tinuod, ikaw nga nagtan-aw sa iyang kahimtang kahibawo sa insakto ug angay buhaton. Apan mas sayon kini isulti kaysa buhaton. Siya ra ang nakasabot ngano nagpadayon siya maski dunay ebidensiya nga gilingla ra siya’g gibakakan. Lagmit namasin nga mausab iyang uyab. O dili ba kaha nagpakabuta tungod sa gugma. Gani, kun ikaw naa sa iyang sitwasyon, basin mao sab imong buhaton.

Busa pasagdi lang siya hangtod nga siya na mismo makaamgo nga igo ra siya giilad. Imo na man gitambagan, dili na ka niya mabasol pag abot sa panahon. Karon kun modangop na sab nimo nga maghilak ug mangayo’g tambag, kuyogi lang, apan ayaw na tambagi. Dili na sab mistil imo nawngon nga gi-ingnan bitaw tika. Pasagdi siya nga makaamgo sa iyang katangahan. Kay ang tinuod, ang tawo nga nahigugma dili makakita sa iyang kahimtang ug kaugalingon, maski manamin pa siya. Sama ra gud sa pulitika, paniid sa mga diehard, makigpatay gihapon alang sa ilang mga idolo maski ginawong na sila sa ebidensiya sa korapsyon. Datu na kaayo ilang mga idolo sa pandarambong, apan sila nagpabalin sa kawad-on. Diha mahisugamak ang mga buta ug bungol. -Tito Miguel- Magpatambag ka? Ipada kang Tito Miguel: 0991-318-9366