Char-char

Dear Tito Miguel,

Ako diay si Asha May, taga  Consolacion, Cebu ug nagtrabaho sa usa ka resto bar. Naa ko'y ka-char char nga ginganlan og Rodel nga kauban rapud nako sa work. Usa ka buwan nami nga char-char. Nangutana siya nako sa niaging adlaw, kun duna ba'y padulngan ang among pag-char char. Nitubag rapud ko niya, nga dili angayan magdali kay giila pa namo og maayo ang tagsa-tagsa namo ka batasan. Kun okay na ang tanan, mao nana ang higayon nga butangan na og label ang among relasyon. Apan sa pagka-karon,  gusto ko nga char-char lang sa. Dili man siya angay magdali kay siya ra baya ang akong gi-entertain nga suitor. Bout huna-hunaon, mura naman og uyab ang among  status. Apan nakugang ko, kay nihagit siya  nga kung magpaugat daw ko, mobiya daw siya. Usa ka buwan ang iyang gitagal. Kun dili nako siya sugton, hunongon na namo ang pagchar-char.  Unsa imong ikasulti Tito Miguel ? - Asha May -

* * *

Asha May,

Ang akong ikasulti depende sa imong gibati. Kun kaya nimo mawala siya, pasagdi kun unsa iyang buhaton. Kun wala ka kabantay, mora ka niya’g gihulga, gihataga’g ultimatum nga kun dili nimo klarohon inyo’ng estado, mobiya na siya kanimo. Kun dili siya makapaabot, dili pa ka niya hingpit nga gihigugma. Mora na man kaha mo’g uyab, label na lang ang kuwang, nganong magdali man nga gitagamtam na man ninyo ang tanan?

Tingali gusto lang niya’g pormalidad, nahadlok siya nga kun kamo magkalawom, basin kalit lang ka mosimang ug moingon wala man mo’y gisabotan. Sakto sab. Inay nga hulgaon ka niya, iya unta ka kumbinsihon pinaagi sa buhat ug pulong nga ikaw iyang gusto makauban. Kun dili na niya buhaton, lagmit taas siya’g garbo, labaw pa sa iyang gibati kanimo.

Kun dili pa ka sigurado niya, pasagdi. Paminawa imong kaugalingon unsa imong bati-on kun siya mawala na. Pahimusli kini nga sukod kun unsa gyud inyong gibati sa usa’g usa. Ka’y kun tinuod ka niya nga gihigugma, mobalik gyud na ini’g kaamgo nga dili siya mabuhi kun wala ka.

Kun dili ka matandog maski wala na siya, buot pasabot taman ra gyud dia’y char-char imong gusto niya. Apan kun ikaw mangita’g mingawon niya, paabota nga mobalik siya. Kun dili, buot pasabot inyong gugma, kun duna man, wala mag-abot.

-Tito Miguel-

Magpatambag ka? Ipada kang Tito Miguel: 0991-318-9366