Life coach

Dear Tito Miguel,

Maayong adlaw! I'm in my  early 40s. Gikontrata ko nga mag life coach mentor ngadto sa usa ka nine-year old boy. Unsa man akong itudlo aning bataa? Asa man ko magsugod? Naa ba nay format, or sequence guide? Tabang!  —Harika

Harika,

Pag-research niini o konsulta sa child psychologist. Pero kay kanako nidangop ka, atong suwayan. Susiha ngano ang ginikanan nidangop kanimo aron giyahan ang bata. Lagmit dili maminaw nila. Pangutana sa ginikanan aron duna kay ideya ngano. Ini’g kita ninyo sa bata, ayaw deretsoha. Kuhaa iyang pagsalig, higalaa siya. Sakyi iyang mga hilig. Samtang imo gikuha iyang kiliti, iyang problema hinay hinay nimo mabati. Kinahanglan dili siya makabantay sa imong misyon, mahadlok hinuon. Ayaw pagsunod sa istrikto nga format o sequence guide, dapat natural ra ang tanan, pero pagbantay sa imong mga lakang. Paminaw sa iyang isulti, labi na sa wala niya gisulti, mao ni ang mas importante. Kay lagmit naa didto ang rason sa iyang batasan ug pagkatawo. Sa insaktong higayon, pangutan-a unsa iyang ambisyon, iyang plano aron makab-ot iyang mga damgo. Kun duna siya’y mga ideya, seryosoha. Dinhi na ka mosulod isip life coach, dayega iyang mga plano, tudloi’g unsaon apan ipasabot nga duna pay alternatibo nga iyang kapilian.

Kinahanglan mosalig siya nga luwas siya kuyog ka, nga dili siya masilotan maski unsa imong mahibaw-an, labi na gyud iyang pagbati. Dili angay kasab-an ang bata tungod kay siya nasuko, nasakitan o na-uwawan. Dili sila silotan sa ilang gibati, wala kini tuyoa. Inay nga kasab-an, angay susihon ngano, unsa iyang nahiagoman. Ang bata nga silotan sa iyang gibati mopahipi. Kinahanglan hangpon ilang mga yangungo, dili kay kasab-an ngano nihilak sila. Labaw sa tanan, kinahanglan ikaw mismo maayo nga ehemplo. Ang batasan dili itudlo, kun dili makutlo. Tito Miguel

Magpatambag ka? Ipada kang Tito Miguel: 0998-581-5856