Ninang sa anak ni Ex

Dear Tito Miguel,

Ako diay si Mae, kahibalo ko nga simple ra kaayo ang akong problema. Mosugot ba ko sa hangyo sa akong ex-boyfriend nga si NJ nga himuong ninang sa bunyag sa iyang anak? Ngayo lang ko sa imong opinion Tito Miguel,salamat kaayo . —MAE

Mae,

Depende. Kun duna pa sila’y relasyon sa inahan sa bata, ma asawa man o uyab, ayaw. Pagbaton og delicadeza. Ngil-ad tan-awon. Maski na hingpit na mo naka move on sa usa’g -usa, duna gihapon mahunahunaan nga lain ang iyang uyab o asawa. Hunahunaa nga gikan sa simbahan hangtod sa kan-anan, dili mo kumportable tulo. Hasta ubang tawo.

Puwede pa, kun single imong ex, wala na’y kalambigitan sa inahan sa bata o dili ba kaha nitaliwan na. Kana kun dili motambong ang inahan. Pero’g naa, distansiya. Ayaw ibutang imong kaugalingon sa bakikaw nga sitwasyon. Depende sad unsa na mo kadugay nagbuwag. Kun kaniadto pa, pananglit sa high school pa nga wala pa moy buot, puwede ra kaayo, maski naa pa ang inahan sa bata. Sigurado nga nalimot na mo sa usa’g-usa, lagmit magkatawa pa mo ngano nahimong kamo. Hasta ang inahan sa bata wala’y makita nga malisya.

Pero kun hingkod na mo nagka relasyon ug presko pa inyong kagahapon, ayaw. Tutal, kun gusto gyud sa imong ex nga duna kay papel sa pagpadako sa iyang bata ug uyon sad ka, dagha’y pamaagi, dili lang ang pagka ninang. Gani, angay na ka modistansiya, ayaw na’g sulod balik sa iyang kinabuhi, maski higala lang. Human na inyong relasyon, ibilin na ngadto sa kagahapon. Tito Miguel

Magpatambag ka? Ipada kang Tito Miguel: 0998-581-5856