Ayaw pagdalidali
Dear TIto Miguel,
Ako si Ninin, minyo ug adunay anak nga 4-years old na. Nagbuwag mi sa akong asawa kay naka-uyab siya og tomboy. Tito Miguel, pwede ba ko makakiha nila or mahimong makiha sila hilabi na sa akong asawa? Naguba among relasyon tungod anang tomboy. Palihug tambagi ko. —Ninin
Ninin,
Kun imo ikiha imong asawa, maglisod ka sa kriminal nga kaso. Adultery unta, apan kinahanglan nakighilawas siya sa laing lalaki. Unya kay ngadto man sa laing babaye, lagmit dili mohaom sa kriminal nga tulobagon. Tingali sa civil nga kaso puwede pa. Annulment, kun wa na kay nakitang purohan kamo magka-uli pa ug gusto na ka taposon ang inyong relasyon. Kun imong tuyo sila duha silotan ubos sa balaod, basin puwede pa ang laing kaso nga civil diin makapangayo ka’g danyos nila duha tungod sa kasakit, kaguol ug kauwaw nga imong gidangatan. Apan ang sila mapreso, mura’g lisod kaayo. Konsulta’g abugado aron sigurado. Pero gawas sa annulment, angay pa ba ka modangop sa korte aron sila silotan? Kun bag-o pa ang hitabo, masabtan nga sa imong kalagot makahunahuna ka’g bawos. Ayaw padalos-dalos. Hatagi‘g higayon ang panahon nga maoy makapalimot nimo. Kay inig mauli-an na ka, ikaw mismo wala nay makitang rason mobuhat pa’g lakang batok nila.
Tinuod sakit ug dili ka kadawat, nga gipulihan ka’g tomboy sa imong asawa. Dakong insulto sa imong pagkalalaki, lagmit mao ni imong gibati. Ayaw hunahunaa nga dunay problema o kuwang nimo, imong asawa ang dunay problema, nakaamgo babaye iyang gusto, o dili ba kaha mao na gyud iyang gipangita sa una pa, nagpahipi lamang ug nagpaabot sa higayon. Ang kapait kay sulod sa inyong kaminyuon. Wa na kay mahimo kun mao na iyang pagkatawo. Sama nimo, babaye ang gipangita. Babaye nga lalaki ang gusto. Dili imong asawa nga babaye ang gusto. —Tito Miguel
Magpatambag ka? Ipada kang Tito Miguel: 0998-581-5856
- Latest