Ayaw siya usba

Dear Tito Miguel,

 Ako diay si Rodel,  akong uyab nga si Letty kay introvert man uy. Ako gyud unta siya nga i-anad og expose ngadto sa akong friends, pero dili gyud siya uy. Mas pilion pa niya nga magpuyo sa ilang balay kay sa mouban sa among barkada outing. Tungod ana, masaypan na hinuon siya nga arte. Unsa akong puwede nga buhaton Tito Miguel aron  mawala ang iyang pagka-introvert?  —Rodel

Rodel,

Ayaw usba iyang pagkatawo. Wala may dautan sa mauwawon ug hilomon o introvert, matud mo. Busa ayaw pugsa nga mokuyog. Apan duna sad kay punto nga masaypan siya nga arte. Aron dili, hangyoa nga kun magsugat o magkita sila, kinahanglan siya motagad, mopahiyom ug motimbaya.

Dili lang sa imong mga barkada, kun dili sa tanan. Mao ni sakto nga pamatasan. Dili kinahanglan makig-istorya’g dugay, puwede ra ang hi, hello, goodbye. Labi na gyud kun siya lamanohon, ihatag iyang kamot. Kay bastos kun dili siya makig-komusta.

Kun gusto gyud ka mokuyog siya, sugdi nga magkuyog siya’g iyang suod nga higala aron naa siya’y kasangga. Naa gyud siya’y usa ka higala, syaro’g wala. Kay mahadlok man na siya istoryahon o duolon, mas maayo didto siya diin siya kumportable, samtang kamo sa imong mga higala maoy mag kumbati. Sa hinay-hinay maanad ra na siya sa ubang tawo. Pero ayaw ipugos aron dili siya mobati’g kabalaka. Pasabta sad imong mga higala kun unsa siya, aron hatagan sad nila’g igong panahon ug espasyo nga kanila makighalubilo.  

Ayaw siya usba kun unsa o kinsa siya, basta wa lang siya’y gitumban o gi-agrabyado nga laing tawo. Kun di gyud madala, dawata ug hangpa. Di pa ka ana, magpundo ra sa balay. Buot pasabot kun magdayon mo, mas ganahan siya moatiman nimo ug sa inyong mga anak. Dili laagan, dili barkadista. Suwerte ka, nakakaplag ka’g pangitaonon karong panahona. —Tito Miguel

Magpatambag ka? Ipada kang Tito Miguel: 0998-581-5856