Dear Tito Miguel,
Maayong adlaw! Ako diay si Christian, ganahan nako nga balikan ang akong ex-girlfriend nga si Melyn. Nagbuwag mi four months ago kay nagbinuang ko , pero nagmahay na ko ron sa akong gibuhat. Unsa akong buhaton, Tito Miguel, aron makumbinser nako siya? Salamat. —Christian
Christian,
Klaroha usa kun siya nag-inusara ba gihapon ug wala pay laing gigahinan sa iyang panahon. Kay kun duna na, respetohi ang iyang bag-o nga kinabuhi. Kun wala pa, duna pa kay pag-asa. Ipakita kaniya nga ikaw nagbasol ug ipasalig nga ang binuang dili na usbon. Lagmit siya nasakitan lamang, apan sa paghigugma kanimo wala moundang. Pangayo’g pasaylo ug ipakita nga ikaw hingpit na nga nagbag-o, aron siya maulian kana maoy labing epektibo.
Panguyabi’g balik, kun giunsa nimo siya’g kumbinsi kaniadto, dobleha imong paninguha. Apan sagoli’g lain nga diskarte, siguroa nga sa mata’g lihok nimo kinahanglan ikaw sinsero. Buhata ang dili na uso, sama sa padala’g buwak o suwat, ayaw ipaagi sa text o social media, balika ang kinaraan kay mas makita nga imong gihagoan. Basin diay mao nay kaniya mogitik ug iyang dughan kanimo mopitik balik.
Lagmit sa primero magdumili, gani mosulti pa na’g wa nay paglaom nga kamo magkauli ug wa na kay labot sa iyang kinabuhi. Ayaw’g undang, igo ra ka gisuwayan. Gusto lamang niya makita nga ikaw nagkalisod paninguha nga kamo magkauli. Silot ang tawag ana. Sukod usab kanimo, kun asa ka taman.
Kun sa iyang pagsuway ikaw molihay, pangutan-a imong kaugalingon, mobalik lang ba ka niya kay imo gyud siya gihigugma o tungod kay imong kauban sa pagbinuang nawala ra ug ikaw karon nag-inusara. Tito Miguel
Magpatambag ka? Ipada kang Tito Miguel: 0998-581-5856