Padayon, ayaw na pangatarungan

Dear Tito Miguel

Ako diay si Christian , dugay nako nga single kay pilian kay ko. Mas ma-attract ko og chix nga single mom. Feel nako kay psychological  matter siya. Dili ko ma-attract og normal lang nga chix, mas appealing for me ang single mom.  Nganong ing-ani kaha akong taste? Gi-try  baya nako nga mo-explore og laing status sa girl, pero dili gyud nako sila feel. —Christian

Christian,

Lahi sa kasagaran imong tipo nga babaye, apan dili buot pasabot sayop kini. Tingali para nimo madanihon ang babaye nga dunay kasinatian sa relasyon, o dili ba kaha nahagit ka nga dunay nakauna niya. Apan kani tanan puro ra pamasin, kay ang klaro nga katin-awan yano ra, ang sama nila imong kinaham. Kun ngano, di na kinahanglan mahibaw-an.

Mahimo ka modangop og psychologist aron masabtan imong panlasa. Apan para unsa pa man nga wa may dautan? Kun kamo nagkasinabot ug malipayon, walay rason nga dili mopadayon. Angay nga ang bata imong dawaton nga walay kundisyon, kay lagmit diha magtubod usa ninyo magkusmod. Timan-i, ang bata sabit kini, dunay higayon nga inyong panagsungi tungod sa bata nga inosente. Kun andam ka sa maong kumplikasyon, padayon.

Apan ayaw pagdali, kay kasagaran sa nangita’g kapikas nga haom sa ilang gidahom, nakakaplag sa simang sa hulmahan. Imong dughan kalit mopitik, ang wa damha kanimo maoy mogitik. Tingali karon ang single moms imo’ng tipo, wa ka kahibawo kalit mausab imo’ng gusto.

Busa paundayoni lang imong kaugalingon, ayaw na kahibulong ngano sila imong gusto gukdon. Ayaw pangita’g katin-awan sa imo’ng gipili nga walay dautan. Gani, di ka angay mangatarungan. Basta way lain nga matumban. Ang tawo lain lain ang gusto, dunay ganaha’g batan-on o maguwang, tambokon o niwangon. Gani, dunay mopili sa bati’g nawong kaysa hitsura nga makapahiyom. Tagamtama ang kanimo makapalingaw karon. Makugang na lang ka layo ra ang imo mapakaslan. — Tito Miguel

Magpatambag ka? Ipada kang Tito Miguel: 0998-581-5856