Dear Tito Miguel,
Ako si Jade, 40, usa ka gay. Ang akong problema bahin sa akong uyab nga lake,taud2x nami ani niya gusto niya magpuyo nami kay love namo usa’g-usa kaso lang, kay mahadlok ko og pasakitan rako nya. Usa pud wala’y nakabawo sa amoa nga gay ko. —Jade
Jade,
Minilyon ang sama nimo nangandoy mabutang sa imong sitwasyon, ang laki na ang makig-ipon, sukwahi sa kasagaran nga sila balibaran. Apan ikaw nag duha duha tungod sa kahadlok nga pasakitan lang ka.
Sa unsang paagi ug rason, wala nimo giklaro. Lagmit nahadlok ka nga dili mo magdugay, mangita gihapon siya’g babaye. Dunay purohan, sama nga walay garantiya nga kun dili mo mag-ipon dili siya mobiya. Sa laktod, mahimo ka’ng pasakitan mag-ipon mo o dili. Pili, makatilaw ka’g mas lawom nga relasyon unya masakitan o wa kay natilawan unya masakitan gihapon. Tingali imo pasabot ma’s sakit kun kamo mag-ipon unya mawala gihapon kay gihatag na nimo imong kaugalingon. Tinuod, apan wala pa ba diay na nimo buhata karon? Sa gugma, mao nay angay buhaton.
Aron di ka masakita’g maayo ini’g hitabo sa gikahadlokan nimo, ayaw pagdahom nga forever kamo. Wala’y kasegurohan ang tanang relasyon, maski unsa pa nga gender. Gani, posible ikaw ang mobiya kay nakakita ka’g lain. Busa pahimusli ang karon, tagamtama ang mata’g adlaw sa inyong relasyon. Kun mobiya gyud, dili na nimo mabasol imong kaugalingon, kay sa gugma imo siya’ng gihataga’g higayon. Apan kun ikaw malipayon sa inyong sitwasyon karon, basin tuod di na ni kinahanglan usbon. Pero pag-abot sa panahon, basin mangutana ka, unsa kaha’g imo lang gihataga’g higayon?
Ang lain nimong suliran kay wa pay nakahibawo sa imong pamilya unsa ka. Sigurado ka? Sa imong edad nga wa pa maminyo, dugay na sila nagduda. Wa kaha sila magpaabot lang kanus-a ka mokumpisal? —Tito Miguel
Magpatambag ka? Ipada kang Tito Miguel: 0998-581-5856