Malditang asawa

Dear Tito Miguel,

Good day, Tito Miguel!

Patambag unta ko nimo unsaon man nako ning akong asawa nga pwerti mang malditaha. Kasaligan ra ba unta. Kabinlan sa balay, maayo moatiman sa among mga anak. Unsa akong buhaton? Hapit nako pul-an ani niya. Lami na ibulag niya Tito. —Vinmark

Vinmark,

Maldita na siya daan o karon lang? Kay kun maldita na daan iya gyud nang batasan. Kun karon lang nimo nakita, basin kaniya wa na ka magpakita. Basin napasagdan nimo inyong relasyon isip magtiayon tungod sa daghang bulohaton. Ibalik ang inyong naandan kaniadtong uyab pa mo o bag-ong minyo. Basin ang katam-is sa inyong gugma nitab-ang tungod sa daghang problema. Usbi’g panguyab aron siya kiligon balik sa imong mga paukyab. Pero kun siya maldita na daan, posible mao ra nay iyang pamaagi pagsulti sa iyang gibati, apan nagpabilin siyang nagmahal kanimo ug sa inyong mga anak. Kun unsa siya kamaldita, lagmit ing ana siya kahigot mopangga ug moamuma. Kun mao ra nay problema niya, angay nimo usbon imong reaksyon. Inay nga moulbo ka, gaksa kaha aron mohumok ug mahanaw ang kasamok. Duna man gani mga lalaki mas maganahan kun ilang uyab o asawa magminaldita kay mosamot kaguwapa matud pa. Pero lagmit ang imong asawa subra na kay nireklamo na man ka. Pangutan-a unsay hinungdan sa iyang salida, ayaw dayon ingna ngano siya maldita, kay basin duna siya’y gusto isulti apan di kahibawo unsay insaktong pamaagi. Ang lihok sa tawo dunay hinungdan ngano, duna la’y higayon nga dili mogawas sa pulong. Kun ikaw napul-an, lagmit siya gikapoy na’g samot gipul-an sa bulohaton sa balay nga balik-balik walay kataposan. Pero kun tanan nimong pagsabot ug pailob walay pulos, angay na ka mopahibawo sa imong pag-antos aron siya makaamgo nga dili siya santos.   —Tito Miguel

Magpatambag ka? Ipada kang Tito Miguel: 0998-581-5856