Seloso kaayong Bana!

Dear Tito Miguel,

Ako diay si Nida, 28 yrs old. Akong patambagan akong bana, sige ko niya og away, seloso kaayo. Wala nako kaagwanta akong gibiyaan. Makigbuwag ko niya dili nako makigbalik. Sige siya panawag nako, dili nako tubagon.Palihug  tambagi ko og unsaon nako,  dili na jud ko makigbalik. Salamat. —Nida

Nida,

Kun ang rason sa imong pakigbuwag kay natuok ka, paminawa usa imong kaugalingon kun hasta gugma nahanaw na. Kay dili ba mao kini ang rason nga kamo nagminyo ug nisaad nga sa usa’g-usa muonong hangtod sa kamatayon? Basin kinahanglan lang mo’g distansiya sa usa’g-usa tungod sa iyang pagka seloso.

Apan tinuod maski siya mosaad nga mag-usab, mobalik gihapon ang iyang naandan nga pagka-hingabubhoan. Lisod usbon kay mao na iyang pagkatawo. Mismo siya dili kapugong sa iyang kaugalingon. Maski wa kay gibuhat iyang hunahuna’g imahinasyon maoy mobuhat.

Apan kun naa pa kay gibati, sa pakigbuwag ayaw pagdali. Imong bana lagmit nanginahangla’g professional help, mahimo siya mopaubos og therapy. Apan kun ang tanang pagbati nahanaw na ug desidido na ka mobiya niya, iklaro kaniya imong plano kay basin nagpatagad lang ka sa iyang pagtuo, mao nga sige’g gukod nimo. Konsulta’g abugado aron ka makahibawo unsaon pag-abli sa kandado sa kaminyuon nga nihupas.

Kun siya magsinamok na o dili ba kaha moabot sa punto nga imong seguridad makompromiso, dunay legal nga pamaagi nga makakuha ka’g proteksyon gikan sa korte nga momando kaniya nga dili moduol kanimo. Kun ang abugado makaabli sa kandado nga nipreso kanimo, siya usab ang makasirado gamit ang laing kandado aron ka magpabiling protektado batok sa posibleng buhaton nga kalapasan ug abuso sa imong bana nga seloso.   —Tito Miguel

Magpatambag ka? Ipada kang Tito Miguel: 0998-581-5856