Tito Miguel

I'm Joyce. I'm 28 years old, taga Cebu City. One year nakong married ug OFW sa UAE akong bana.  Nitipon ko'g puyo sa akong parents-in-law, and naa gyud mi friction ug ako nalay mo-adjust.Ganahan nami makatukod og balay sa among napalit nga yuta. Nasabutan pud nga kami sa akong bana ang mugasto sa pagkaon, suga ug tubig sa ilang balay kada bulan, aron makatigom pud mi. Karon Tito Miguel, Aakong mother-in-law mangigi man nganong dili na mutabang og gasto akong bana sa iyang duha ka mga manghod nga naa pa sa college. Igo-igo ra baya pud ang ipadala sa akong bana kay last January paman to siya nakalarga. Wakoy trabaho kay mabdos ko sa among first baby. Unsa may angay nakong buhaton?

Joyce

* * *

Joyce,

Tungod sa kalisod, halos tanang pamilya nakasinati sa imong suliran. Imong gipakaslan apil ang pamilya sa imong bana ug ilang kahimtang.

Sakripisyo iya’ng pagsagubang sa panginahanglan sa iyang pamilya. Mahimo na unta siya mobalibad sa edukasyon sa mga manghod kay dili ni iya’ng responsibilidad kun dili sa ilang mga ginikanan. Asa man tuod ilang amahan? Apan kun ikaw naa sa kahimtang sa iyang inahan, di sad malikayan nga mosangpit sa duna’y income. Pero kinahanglan dunay utlanan, kay kun wala maapiki inyong sinugdanan. Mahimo man nga ang usa ka manghod manrabho samtang ang usa nagtiwas sa kolehiyo. O dili ba kaha sagubangon ang duha apan inig gradwar sa usa siya na sab ang mopaeskuyla sa ikaduha.

Pero kini nga mga solusyon kinahanglan imong bana maoy mamulong kay sigurado kun ikaw, kontrabida ilang tan-aw. Istoryaha imo’ng bana nga andam ka mohuwat nga kamo makatukod sa inyong kaugalingong panimalay.  Suportahi siya. Dili lalim magpatunga sa duha niya ka pinangga labi na asawa ug inahan. Ang iya’ng panrabaho sa gawas igo na nga sakripisyo, ayaw na ninyo pun-i sa inyong panagbangi. Tutal, wala man mo pasagdi. Ang problema lang kay madelantar inyong mga plano. Agwanta usa. Duna gani uban nag ipon gihapon hangtod nangatiguwang. Manganakay raba ka, kinahanglan ka’g suporta nila.

Masabtan kun di ka kaagwanta. Angay molain kay maski unsaon duna gyud tension kun padayon mo moipon. Imong mother-in-law kumpetensiya ang tan-aw kanimo. Di siya magpangikog. Iya’ng gisaligan labaw ang inahan kanimo nga gipakaslan.

Pauli usa sa imong pamilya o dili ba kaha pangabang. Aron sa hinay hinay makatukod mo’g balay, unaha nga maporma, unya na ang paporma aron dili dako’g gasto. Basta lig-on ug kumportable, dili kinahanglan nindot aron ikapasigarbo. Inig lingkawas sa imong bana sa iyang pamilya, makapatuyang na mo sa inyong gusto. Samtang daghan pa’g gastohanan, pugngi usa inyong paghinamhinam. Ang balay puy-anan, dili kay ipanghambog sa uban.

Tito Miguel