95k COVID contact tracers kailangan – DOH
MANILA, Philippines — Upang mas maging epektibo sa pagtukoy sa mga taong may COVID-19, nangangailangan pa ang Department of Health (DOH) ng 95,000 contact tracers na susuwelduhan ng pamahalaan para hanapin ang mga nahawa ng virus.
Sinabi ni Health Undersecretary Ma. Rosario Vergeire na 126,000 contact tracers ang ideal na kailangan ng pamahalaan kung saan mayroon nang 38,000 buhat sa mga lokal na pamahalaan kaya 95,000 ang kailangang punuan ng nasyunal na pamahalaan.
Tatanggap ang mga makukuhang contact tracers ng suweldo base sa salary grade na itinatadhana ng civil service law. Binubuo pa ng pamahalaan ang mga ‘minimum qualifications’ para sa naturang posisyon.
Inaasahan na makakatulong ang naturang trabaho sa mga manggagawa na nawalan ng empleyo ngayong panahon ng pandemya dahil sa pagkalugi ng mga negosyo. Una nang sinabi ng Department of Finance na nasa 1.2 hanggang 1.5 milyong Pilipino ang pansamantalang nawalan ng trabaho.
Samantala, naglunsad ang DOH ng isa pang telemedicine site na healthknow.ph kung saan maaaring makipag-video call sa mga doktor ang mga pasyente na kailangan ng konsultasyong medikal.
Libre ang serbisyo at bibigyan ng 15 minuto ang isang caller para magpakonsulta. Dahil limitado ang oras, dapat ilista na agad ng caller ang kanilang mga kundisyon na nararamdaman tulad ng body temparature at blood pressure habang mga ‘over the counter’ na gamot lamang ang mairereseta ng mga doktor.
- Latest