Tito Miguel

Dear Tito Miguel,

Tawga lang ko og James, I'm 22 years old ug senior high student sa usa sa mga pribado nga tunghaan sa dakbayan sa Sugbo. Duha mi ka managsuon. Nawad og trabaho akong mga ginikanan last year mao naglisud mi karon financially.

Tito Miguel, unsay angayan buhaton? Wala pakoy pang tuition, ting exam na pud. Mo stop na lang kaha ko'g skwela? Hagbong pajud ko last grading --7 kabuok ako hagbong.

Naglibog ko basin mahagbong rako'g balik karon nga grading nya mura'g masayang ra ang tuition. Tiwason nako or dili?

Palihug tambagi ko, Tito Miguel — James

James,

Ipadayon lang usa ang imong nasugdan karon. Agwantaha ang kalisud sa pag-eskuela nga kuwangan ang pinansiyal. Ipakita sa imong mga maestro’g maestra ang paninguha nga maapas nimo’g bawi imong mga grado nga nangahiwi aron sila mismo makaamgo sa imong kahago. Apil ang batasan ug determinasyon sa kwentada sa grado, dili kini sa pasulit limitado.

Bata pa ka, duna ka’y igong enerhiya aron mosagubang sa pisikal ug mental nga panginahanglan sa klase. Ang kawad-on dawata nga hagit sa imong katakus ug determinasyon.

Apan inig human nimo sa school year karon, mahimo nga temporaryo kang moundang kun di gyud madala sa inyong pinansiyal ug wa ka’y laing kadangpan nga mga paryente o dili ba kaha scholarship. Tinuod, ang kawad-on makapawa’g gana ug paglaum hangtod sa tutok ikaw mosimang. Lagmit mao ni ang hinungdan nga sa niaging grading period daghan ka’g nahagbongan.

Apan sa imong pag-undang, ang pangempleyo o negosyo kinahanglan nimo sugdan aron makatigum ka para isuporta sa imong kaugalingon pagbalik nimo sa klase puhon. Ayaw ipaubos imong pagtan-aw sa imong kaugalingon sanglit wa pa ka moabot sa graduation. Timan-i, ubay ubay ang mga labing adunahan sa kalibotan ang sa pangeskuela wa kahuman.

Kay ang paglampos sa kinabuhi dili lamang gidiktahan sa edukasyon nga nahuman. Diskarte ang mas labing hait nga hinagiban nga motabas tabas sa mga hagit nganong ikaw sa pangeskuela wala katiwas. Di lang kini nimo makutlo sulod sa lawak tunghaan, makat-unan sab ni nimo sa labing dako nga kawanangan —ang katilingban ug kalibotan. 

Tito Miguel