Tito Miguel

Dear Tito Miguel,

Ako diay si Jay, 24 years old,  pipila ka  bulan nako nga single sukad  mi nagkabuwag ni Riezel,  25, years old.

Gibuwagan ko niya kay  busy daw siya sa iyang work isip manager sa usa fast food chain.

Nagpakiluoy ko niya niadtong higayona nga dili mi magbuwag, pero tibuok na gyud iyang hukom.

Wala koy mabuhat, kutob na lang ko sa paghilak.

Ako na lang gilingaw akong self uban sa akong mga higala hangtud nga hingpit na gyud ko naka- move on.

Apan sa miaging mga adlaw, nagparamdam ma’g balik  si Riezel.

Nangita siya og way nga magka-istorya mi. Bisan unsaon nako og likay, modutdot gyud siya sa iyang kaugalingon  dinhi kanako. Permi siya patabang sa akong barkda aron magkabalik mi. Dili ko ganahan nga magbalik mi, kay mahadlok ko nga pasakitan na pud ko niya. Isip lalaki, maikog o malouy man ko moprangka niya uy. Unsa ako buhaton Tito Miguel? Patabang ko sa akong isulti niya nga dili ko molabas nga tantong salbahis.  Salamat.

Jay,

Dili salbahis ang tawo nga motug-an sa tinuod, depende ra na unsaon nimo’g klaro nga kaniadto ikaw kaniya nigukod apan karon palayo imo siya itukmod. Ang salbahis kadtong mamakak ug manlingla sa tinuod.

Masabtan nga maikog ug maluoy ka mo prangka niya. Nagpabilin ka sa naandan nga ang lalaki ang mogukod ug mangamuyo sa babaye ug ang babaye ang mobalibad sa lalaki. Undang na sa maong pagtuo kay nabiyaan na ka sa paglambo sa panan-aw sa katilingban ngadto sa gender roles. Sa usa ka relasyon, maski kinsa puwede mogukod, mangamuyo, mohangyo ug mobalibad.

Mas maikog ug maluoy ka niya kun di ka magklaro asa siya dapit sa imong kinabuhi karon. Ang bugtong pamaagi aron dili makomplikar tanang matang sa relasyon mao ang pagsulti sa tinuod nga gibati sa usa’g-usa. Ang pagtago ug pagpamakak maoy hinungdan ang relasyon mabuak.

Kun giunsa niya pagparamdam, ang imong pagpadayag diha ra pud taman. Kun pinaagi lang sa private message o sa barkada, diha ra sad ipaagi imong tubag niya, nga imong gikalipay ang iyang katuyoan apan lahi na imong sitwasyon karon, dili sama kaniadto nga di ka mabuhi kun mawala siya nimo. Sa pagsulti nimo nga nalipay ka sa iyang pagparamdam, dili ka tantong garboso, apan ang kamatuoran nga ang pagbati nahanaw na kinahanglan mapaklaro.

Kun siya makigkita sa personal, ayaw ihikaw, aron masuta sad nimo kun hingpit bang nawala imong gibati niya o basin motuyhakaw. Kun nahanaw, ingna wala ka unta manirado mabalik imong gibati kaniadto, apan karon wala na, ikaw sigurado.

Sa wa nimo pagpanirado, ang imong dating dili negatibo. Apan klaroha nga wa na siya’y mapaabot nimo. Firm in decision, but kind in tone.

Kun pananglit dunay mopitik, ikaw ra’y makahukom kun mosugal ka’g balik sa babaye nga kaniadto nibalewala nimo tungod lamang sa trabaho.

Tito Miguel